भेनेजुयलामा विनाशकारी भूकम्पः हालसम्म ९२० जनाको मृत्यु, लाखौं घाइते

अन्तर्राष्ट्रिय

गृहपृष्ठ
अन्तर्राष्ट्रिय

भेनेजुयलामा विनाशकारी भूकम्पः हालसम्म ९२० जनाको मृत्यु, लाखौं घाइते

क्यापिटल नेपाल शनिबार, असार १३, २०८३

काठमाडौं। भेनेजुयलामा बुधबार गएको दुई शक्तिशाली भूकम्पमा मृत्यु हुनेको संख्या ९२० पुगेको छ। मृतकमध्ये विभिन्न देशका नागरिक पनि रहेको सम्बन्धित देशले पुष्टि गरेका छन्।

हालसम्म प्राप्त विवरणअनुसार भूकम्पमा पोर्चुगिज नागरिक वा पोर्चुगिज मूलका १५ जनाको मृत्यु भएको पुष्टि भएको छ। पोर्चुगलको विदेश मन्त्रालयले यसअघि ९ जनाको मृत्यु र ५६ जना बेपत्ता रहेको जनाएको थियो।

चीनको सरकारी प्रसारक सिसीटिभीले काराकासस्थित चिनियाँ दूतावासलाई उद्धृत गर्दै सात चिनियाँ नागरिकको मृत्यु भएको जनाएको छ। दूतावासले भेनेजुयलामा रहेका आफ्ना नागरिकलाई पराकम्पन तथा अन्य सम्भावित जोखिमप्रति सतर्क रहन आग्रह गरेको छ।

स्पेनले पनि आफ्ना कम्तीमा पाँच नागरिकको मृत्यु भएको तथा ११९ जना अझै बेपत्ता रहेको जनाएको छ। भग्नावशेषबाट १४ जनालाई फेला पारिएको स्पेनी अधिकारीले बताएका छन्।

स्पेनले राहतका लागि १० लाख युरो सहयोग घोषणा गरेको छ। आधिकारिक तथ्यांकअनुसार भेनेजुयलामा करिब एक लाख ४७ हजार स्पेनी नागरिक बसोबास गर्दै आएका छन्।

ब्राजिलको विदेश मन्त्रालयले भूकम्पमा आफ्ना दुई नागरिक–एक पुरुष र एक महिलाको मृत्यु भएको पुष्टि गर्दै उनीहरूका परिवारलाई कन्सुलर सहयोग उपलब्ध गराइरहेको जनाएको छ।

इटालीको विदेश मन्त्रालयका अनुसार सबैभन्दा बढी प्रभावित ला गुएरा क्षेत्रमा भवन भत्किँदा काराकासमा जन्मिएका तथा इटालियन र भेनेजुयली दुवै नागरिकता भएका ५० वर्षीय एक पुरुषको मृत्यु भएको छ। इटालीका करिब एक लाख ७० हजार राहदानीवाहक भेनेजुयलामा बसोबास गर्दै आएको अनुमान गरिएको छ।–एजेन्सी

प्रकाशित मिति: शनिबार, असार १३, २०८३ १२:०९

प्रतिक्रिया दिनुहोस्