काठमाडौं। अर्धचालक (चिप्स) कम्पनीहरूको शेयरमा सुधार देखिएपछि बिहीबार एशियाली शेयर बजार उकालो लागेको छ। तर, इरान–अमेरिका तनाव पुनः चर्किएसँगै कच्चा तेलको मूल्य बढ्दा मुद्रास्फीतिको चिन्ता गहिरिएको छ र विश्वव्यापी ऋणपत्र बजारमा दबाब परेको छ।
अमेरिकी राष्ट्रपति डोनाल्ड ट्रम्पले इरानसँग युद्ध अन्त्यका लागि भएको अन्तरिम सहमति समाप्त भएको बताएका छन्। त्यसलगत्तै अमेरिकी सेनाले हर्मुज जलडमरूमध्य खुला गराउने उद्देश्यले लगातार दोस्रो दिन इरानमाथि आक्रमण गरेपछि अन्तर्राष्ट्रिय बजारमा तेलको मूल्य तेस्रो दिन पनि बढेको हो। यद्यपि ट्रम्पले पूर्ण युद्धमा अवस्था नपुग्ने विश्वास व्यक्त गरेपछि लगानीकर्ताको चिन्ता केही मत्थर भएको छ।
अमेरिकी शेयर बजार सुरुमा ट्रम्पको अभिव्यक्तिपछि ओरालो लागे पनि कारोबारको अन्त्यतिर सुधार देखिएको थियो। चीनले आफ्ना प्रमुख कृत्रिम बौद्धिकता कम्पनीहरूलाई सीमित मात्रामा उन्नत अर्धचालक खरिद गर्न अनुमति दिने तयारी गरिरहेको समाचारपछि अर्धचालक क्षेत्रका कम्पनीहरूको शेयर मूल्यमा उल्लेख्य वृद्धि भएको छ।
जापानबाहेकका एशिया–प्रशान्त क्षेत्रका शेयरहरूको संयुक्त सूचक ०.८ प्रतिशतले बढेको छ भने जापानको प्रमुख शेयर सूचक २.३ प्रतिशतले उकालो लाग्दै लगातार तीन दिनको गिरावट अन्त्य गरेको छ।
दक्षिण कोरियाको प्रमुख शेयर सूचक ३.८ प्रतिशतले बढेको छ। अर्धचालक उत्पादन गर्ने प्रमुख कम्पनीहरूको शेयरमा खरिद बढेपछि बजारमा उत्साह देखिएको हो।
बजार विश्लेषकहरूका अनुसार लगानीकर्ताहरू अझै पनि इरानसँगको तनाव अन्ततः कम हुँदै वार्ताको बाटो खुल्ने अपेक्षामा छन्। तर परिस्थिति तीव्र गतिमा परिवर्तन भइरहेकाले बजारमा अनिश्चितता कायम रहेको उनीहरूको भनाइ छ।
फेडरल रिजर्भको पछिल्लो बैठकको विवरणले केही नीति निर्माताहरू बढ्दो मुद्रास्फीतिप्रति चिन्तित रहेको देखाएको छ। केही सदस्यले ब्याजदर वृद्धि गर्नुपर्ने अवस्था आएको धारणा राखे पनि अन्ततः बैंकले दर यथावत् राख्ने निर्णय गरेको थियो।
यसबीच विश्वव्यापी ऋणपत्र बजारमा बिक्री दबाब बढेको छ। जापान, अस्ट्रेलिया र अमेरिकाका दीर्घकालीन सरकारी ऋणपत्रहरूको प्रतिफल पछिल्ला वर्षहरूकै उच्च स्तरमा पुगेको छ।
मुद्रा बजारमा भने ठूलो उतारचढाव देखिएको छैन। अमेरिकी डलर जापानी येनको तुलनामा केही कमजोर बनेको छ भने युरो र बेलायती पाउन्ड सामान्य रूपमा मजबुत भएका छन्।
सुनको मूल्य स्थिर रहँदै प्रतिऔँस ४ हजार ७९ डलर हाराहारीमा कारोबार भएको छ।
