×

ताराखोला गाउँपालिकाको बजेट ३६ करोड ६६ लाख

images

गलकाेट । बागलुङको ताराखोला गाउँपालिकाले ३६ करोड ६६ लाख ९२ हजार रूपैयाँ बजेट सार्वजनिक गरेको छ । 

गाउँपालिकाको दोस्रो गाउँसभा तथा प्रथम अधिवेशनबाट गाउँपालिकाका उपाध्यक्ष भीमबहादुर रोकाले प्रस्तुत गरेको बजेट वक्तव्यमा गाउँपालिकाले कृषि, शिक्षा, स्वास्थ्य, पर्यटन र कृषिउपजको बजारीकरणका लागि प्राथमिकतामा राखिएको छ । 

गाउँपालिकाले सङ्घीय सरकारबाट शसर्त अनुदानमार्फत प्राप्त गरेको १६ करोड ५४ लाख रूपैयाँ, वित्तीय समानीकरण अनुदान ७ करोड ९९ लाख र राजस्व बाँडफाँट बाट ६ करोड ७३ लाख २६ हजार रूपैयाँ प्राप्त गरेको थियो ।

त्यस्तै गण्डकी प्रदेश सरकारबाट समानिकरण अनुदान रु ७९ लाख ६४ हजार, राजश्व बाँडफाँट  ३८ लाख नौ हजार रूपैयाँ, संघीय सरकार विशेष अनुदानबापत १ करोड २० लाख रूपैयाँ, संघीय सरकार समपूरक अनुदान ७० लाख रूपैयाँ, गण्डकी प्रदेश सरकार समपूरक अनुदान ४० लाख रूपैयाँ र चालू आर्थिक वर्षको  ८२ लाख ९३ हजार रूपैयाँ मौज्दात र आगामी आर्थिक वर्षको आन्तरिक आम्दानी  ५० संकलन हुने गरी गाउँपालिकाले  ३६ करोड ६६ लाख ९२ हजार रूपैयाँ बजेट सार्वजनिक गरेको हो । 

गाउँपालिकाले चालु खर्चतर्फ ६ करोड सात लाख रूपैयाँ, पुँजीगत खर्चतर्फ  १४ करोड  ६३ लाख २९ हजार रूपैयाँ, सशर्त अनुदानसहित चालू खर्च २२ करोड ३ लाख ६३ हजार रूपैयाँ विनियोजन भएको छ । 

पालिकाले कृषि विकासतर्फ १ करोड ५६ लाख २५ हजार रूपैयाँ, पशु विकासतर्फ १ करोड १९ लाख ६० हजार रूपैयाँ, सामाजिक विकासको शिक्षातर्फ १ करोड १० लाख ८७ हजार रूपैयाँ, खानेपानी तथा सरसफार्यमा ९६ लाख रूपैयाँ, पूर्वाधार विकासमा ५ करोड १२ लाख २० हजार रूपैयाँ, वन वातावरण तथा विपद् व्यवस्थापनमा  ७० लाख रूपैयाँ, गाउँपालिकाको प्रशासनिक खर्चका लागि र ६ करोड ४८ लाख १६ हजार रूपैयाँ विनियोजन गरेको छ । 

भातखानेडाँडा वडा नम्बर १ जाने सडक स्तरोन्नतीका लागि १ करोड ४० लाख रूपैयाँ, सादी हिल गाउँ पँधेराखोला, बराहखोला सडक स्तरोन्नतिका लागि  ८० लाख रूपैयाँ, घुस्मेली सभाहल सडक स्तरोन्नतिका लागि  ६० रूपैयाँ विनियोजन भएको छ । 

यस्तै पालिकाले कृषिउपजको बजारीकरण, जनयुद्ध घाइते तथा सहिद परिवारलाई भत्ता र विद्यालयमा निःशुल्क स्यानेटरी प्याडको व्यवस्था गरिएको बजेटमा उल्लेख गरिएको छ ।   

बागलुङको ताराखोलाले सशस्त्र द्वन्द्वकालका शहीद, बेपत्ता र घाइते तथा अपांगको स्मरणमा युद्ध स्तम्भ बनाउने भएको छ । जनयुद्ध दिवसमा सार्वजनिक बिदासमेत दिएको यो पालिकाले ‘द्वन्द्वका घाउमा मलम’ लगाउने गरी नीति तथा कार्यक्रममापनि जोडेको अध्यक्ष धनबहादुर विक ‘हिमाल’ले बताए। 

बजेटमा जनयुद्ध दिवश, सहिद सप्ताह कार्यक्रम सञ्चालनलगायतमा व्यवस्था भएको हो । यसका लागि २४ लाख बजेट विनियोजन भएको छ । जनयद्धमा ताराखोलाका २३ सहिद भएका थिए भने दुई जना बेपत्ता र दर्जनाैं घाइते छन् । अध्यक्ष विकसमेत जनयुद्धका घाइते हुन् । उनको शरीरमा समेत गोलीका छर्रा अझै बाँकी छन् । 

गाउँपालिकाले आफ्नो सभाहलमा सहिदको तस्बिर सजाएर राखेको छ । सहिद सप्ताहमा उनीहरुको परिवार सम्मान गर्ने, सहिदका छोराछोरीलाई छात्रवृत्ति दिनेलगायतको काम गर्दै आएको छ ।

श्रमदान गरेर बनाइएको सडकलाई स्तरोन्नतिका लागि बजेट विनियोजन गरिएको छ । गण्डकी प्रदेश र संघीय सरकारको अनुदानसमेत जुटाएर सडक चौडा पार्ने काम भइरहेको छ । तत्काल स्तरोन्नति गरेर बर्सातमा पनि नियमित सवारी चलाउन बजेटमा रु २० लाख विनियोजन गरिएको हो । 

गाउँपालिकाले सहिदपार्क निर्माणका लागि ५ लाख रूपैयाँ बजेट विनियोजन गरेको छ । ताराखोलाले वडा नंं २ को ओसमरको गयार भन्ने स्थानमा उद्यानको तयारी छ । उद्यानसँगै २३ सहिदको अर्धकदको मूर्तिसमेत बनाइने छ ।

शुक्रबार​ १० असार २०७९ ०१:२९ PM मा प्रकाशित

प्रतिक्रिया