सवारी लाइसेन्स परीक्षा फर्म भरेर पैसा नबुझाएकाले पुनः आवेदन दिनुपर्ने

मुख्य समाचार

गृहपृष्ठ
मुख्य समाचार

सवारी लाइसेन्स परीक्षा फर्म भरेर पैसा नबुझाएकाले पुनः आवेदन दिनुपर्ने

क्यापिटल नेपाल शुक्रबार, असार १८, २०७८

काठमाडौं । सवारी अनुमतिपत्र (लाइसेन्स) को फर्म भरेर शुल्क बुझाउन नपाएका आवेदकहरुले पुनः भर्नुपर्ने भएको छ । गएको माघमा लाइसेन्सको आवेदन फर्म भरेर बन्दाबन्दी (लकडाउन) का कारण परीक्षा मिति गुज्रेका आवेदकहरुले पुनः आवेदन भर्नुपर्ने यातायात व्यवस्था विभागले जनाएको छ ।

पहिलो चरणको निषेधाज्ञा जारी भएको १० महिनापछि माघमा सवारी लाइसेन्सको आवेदन खुलेको थियो । तर, वैशाख १६ गतेदेखि जारी भएको दोस्रो चरणको निषेधाज्ञाका कारण देशभरका ‘ट्रायल सेन्टर’ बन्द भएपछि परीक्षार्थीहरुको मिति गुज्रिएको थियो ।

मिति गुज्रेका परीक्षार्थीहरुले पुनः आवेदन दिने व्यवस्था गरिए पनि नयाँ आवेदन खुलाउने मिति अहिले नै तय गर्न नसकिने विभागका सूचना अधिकारी लोकनाथ भुसालले क्यापिटल नेपाललाई बताए ।

‘दोस्रो आवेदन कहिले खुलाउने भन्नेबारे केही निर्णय भएको छैन । कोभिड संकट व्यवस्थापन समिति (सीसीएमसी) ले अवस्था मूल्यांकन गरी स्कुल, कलेज, ट्रेनिङ सेन्टर नखुलाएसम्म ट्रायल सेन्टर खुल्दैन,’ भुसालले भने, ‘ट्रायल सेन्टर र यातायात कार्यालयहरु खुलेर नियमित कामहरु गर्न थालेपछि मात्र हामी दोस्रो आवेदन खुलाउँछौं ।’

परीक्षा उत्तीर्ण गरिसकेपछि सवारी चालकलाई एक वर्षसम्मको परीक्षणकालीन लाइसेन्स प्रदान गर्ने विभागले बताएको छ । उक्त लाइसेन्समा बारकोड तथा क्युआर कोड हुने र आगामी दिनमा सवारी चालकले भौचर विल बोकेर हिँड्ने बाध्यताको अन्त्य हुने भुसालले बताए ।

प्रकाशित मिति: शुक्रबार, असार १८, २०७८ १६:५४

प्रतिक्रिया दिनुहोस्