राष्ट्र बैङ्कले स्रोत खोजेपछि विदेशी लगानीका लागि अनुमति मागेका २६ कम्पनी सम्पर्कविहीन

उद्योग

गृहपृष्ठ
उद्योग

राष्ट्र बैङ्कले स्रोत खोजेपछि विदेशी लगानीका लागि अनुमति मागेका २६ कम्पनी सम्पर्कविहीनस्रोत खुलाउन दिएको समय बुधबार सकिँदै

क्यापिटल नेपालमंगलबार, भदौ ३, २०७६

काठमाडौं । नेपाल राष्ट्र बैङ्कले स्रोत खोजेपछि नेपालमा विदेशी लगानी ल्याउन अनुमति मागेका २६ ओटा कम्पनी सम्पर्कविहीन भएका छन् । विदेशी लगानीको स्रोत देखाउन नसकेपछि उनीहरु सम्पर्कविहीन भएका हुन् । केन्द्रीय बैङ्कले एक महिनाभित्र सम्पर्कमा आउन भने पनि हालसम्म नआएको विदेशी विनिमय विभागकी कार्यकारी निर्देशक सरिता भट्ट अधिकारीले बताइन् ।

राष्ट्र बैङ्कले गत साउन ४ गते ती कम्पनीहरुका नाममा सूचना जारी गरेको थियो । तर, एक महिनाका लागि जारी गरिएको सो सूचनाको समय सकिन अब एक दिन मात्रै बाँकी छ । ४ गते राष्ट्र बैङ्कले दिएको एक महिनाको समयावधि सकिँदैछ । एक महिनाको अवधिमा उनीहरु केन्द्रीय बैङ्कको सम्पर्कमा नआएको अधिकारी बताउँछिन् ।

विदेशी लगानी ल्याउन अनुमति मागेका अधिकांश कम्पनीहरुले लगानीको स्रोत जुटाउने प्रमाण पेस गर्न नसकेको उनको भनाइ छ । अहिले केही कम्पनीले मात्रै सोधपुछ गर्ने गरेको उनले जानकारी गराइन् । राष्ट्र बैङ्कका अनुसार मार्बल कन्स्ट्रक्सन प्रालि, होटल रियुनियन, नेपाल चाइना गुडविल ड्रिङ्क्स प्रालि, हाइल्यान्ड स्क्रसन नेपाल, हिमालयन कन्फाइन गेष्टहाउस, स्मार्ट टेक जीसीसी रिसोर्ट, सोलुसन र अन्जलीज डल्फिन रिसोर्ट प्रालिलगायतका विभिन्न २६ ओटा कम्पनी छन् । विदेशी लगानी पर्यटन क्षेत्रमा ल्याउन लागिएको देखिएको छ ।

स्रोत खुलाउनु पर्ने कानुनी व्यवस्थाले गर्दा धेरै कम्पनीहरुको लगानी रोकिएको छ । पछिल्लो समय अजेय सुमार्गी र आनीछोई डोल्माको ठूलो रकमको स्रोत नखुलेपछि राष्ट्र बैङ्कले रोकेको छ ।