नबिल र लगानी बोर्डबीच लगानी प्रवर्द्धन गर्ने सम्झौता, विदेशी लगानी भित्र्याउन सहज

उद्योग

गृहपृष्ठ
उद्योग

नबिल र लगानी बोर्डबीच लगानी प्रवर्द्धन गर्ने सम्झौता, विदेशी लगानी भित्र्याउन सहज

क्यापिटल नेपालबुधबार, जेठ ४, २०७९

काठमाडौं । लगानी बोर्ड र नबिल बैंकबीच लगानी प्रवर्द्धनका लागि सम्झौता भएको छ । बुधबार लगानी बोर्डको कार्यालय नयाँ बानेश्वरमा भएको साे सम्झौतामा बोर्डका प्रमुख कार्यकारी अधिकृत (सीईओ) सुशील भट्ट र नबिल बैंकका सीईओ अनिल शाहले हस्ताक्षर गरेका हुन् ।

लगानी बोर्डले आफ्नो स्थापनाको १० वर्षपछि बैंकसँग साझेदारी गरेर लगानी भित्र्याउनका लागि सम्झौता गरेको जनाएको छ । नबिल बैंकका डेपुटी जीएम आदर्श बजगाईंका अनुसार बैंकले विदेशी लगानी नेपाल भित्र्याउनका लागि बोर्डमा डेस्क राख्ने तथा विदेशमा लगानीकर्ता खोज्ने छ ।

बोर्ड र बैंकबीच लगानी प्रवर्द्धनका लागि सम्झौता भए पनि कस्तो–कस्तो क्षेत्रमा लगानी गर्ने भन्ने विषय टुङ्गो लागेको छैन । सडक, विद्युतलगायत क्षेत्रको लागि लगानी भित्र्याउने विषयमा छलफल भएको बताइएको छ ।

लगानी प्रवर्द्धन सम्झौता कार्यक्रममा बोल्दै नबिल बैंककमा सीईओ साहले भने, ‘नेपालमा विदेशी आएर घुम्ने/रमाउने मात्र नभई लगानी गर्ने वातावरण बनाउनुपर्ने चुनौती हामीसँग छ । यो सम्झौता सुरुवात मात्रै हो काम गर्नै बाँकी छ ।’ तत्कालै प्रतिफल नखोजी निरन्तर काम गरेपछि मात्रै सफलता प्राप्त हुने उनको भनाइ छ ।

लगानी बोर्ड अरुले काम गरेको ठाउँमा हिँड्ने नभई आफूले नै नयाँ बाटो बनाउने बोर्ड भएको बैंकले जनाएको छ । सम्झौतापछि लगानी बोर्डका सीईओ भट्टले नबिलसँग सहकार्यले विदेशी लगानी भित्र्याउन सहज हुने बताएका छन् । लामो प्रतीक्षापछि बैंकसँग सहकार्य गर्न पाएको भन्दै हालसम्म बोर्डमा सम्झौता भएकामध्ये ४ वटा आयोजना कार्यान्वयनको चरणमा पुगेको बताएका छन् । उक्त चारवटा आयोजनाको लागत ३ खर्ब रुपैयाँ रहेको बोर्डले जनाएको छ । हालसम्म बोर्डले ३१ वटा प्रोजेक्टमा लगानीको लागि स्वीकृत गरिसकेको छ ।

प्रकाशित मिति: बुधबार, जेठ ४, २०७९ १६:५१

प्रतिक्रिया दिनुहोस्