एक्सपर्ट हाइड्रोले ८ अर्ब लगानीमा सानीभेरी आयोजना बनाउँदै, ४२ महिनामा सक्ने

पूर्वाधार

गृहपृष्ठ
पूर्वाधार

एक्सपर्ट हाइड्रोले ८ अर्ब लगानीमा सानीभेरी आयोजना बनाउँदै, ४२ महिनामा सक्ने

क्यापिटल नेपालमंगलबार, भदौ २८, २०७९

काठमाडौं । निजी लगानीमा ४४.५२ मेगावाटको सानीभेरी जलविद्युत आयोजना निर्माण हुने भएको छ । आयोजना निर्माण तथा बिजुली उत्पादन गर्न विद्युत विकास विभागले विकासकर्ता एक्सपर्ट हाइड्रो इन्भेष्टमेन्ट प्राइभेट लिमिटेडलाई अनुमतिपत्र (लाइसेन्स) दिने प्रक्रिया अघि बढाएको छ ।

कम्पनीले लाइसेन्सका लागि आवेदन दिएकाले विभागले प्रक्रिया अघि बढाएको हो । ३५ दिनपछि कम्पनीले विद्युत उत्पादनको लाइसेन्स पाउने छ । आयोजना बनाउन ८ अर्ब रुपैयाँ लाग्ने अनुमान गरिएको छ । काम सुरु भएको साढे ३ वर्ष (४२ महिना) मा आयोजना सम्पन्न गर्ने लक्ष्य लिएको विकासकर्ता एक्सपर्टले जनाएको छ ।

नदी प्रवाही (रन अफ दि रिभर) आयोजनाबाट वार्षिक २८ करोड ३३ लाख ७० हजार युनिट बिजुली उत्पादन हुने कम्पनीले गरेको अध्ययनले देखाएको छ । आयोजनाको ग्रसहेड १४४ मिटर रहेको छ । आयोजनाको मुख्य संरचनाहरु सानीभेरी नदीको बाँयाँ किनारामा पर्छ ।

आयोजनाको हेडवक्र्स पुथा उत्तरगंगा गाउँपालिकाको ७ र १४ नम्बर वडामा पर्छ । सुरुङको लम्बाइ ४.१३ किलोमिटर रहेको छ । विद्युतगृहमा २३ मेगावाटको भर्टिकल एक्सिस फ्रान्सिस्को टर्वाइनहरु जडान गरिने भएको छ । विद्युतगृहमा २ वटा जेनेरेटरहरु जडान गरिने भएको छ । सोही जेनेरेटरबाट ४४ मेगावाट बिजुली उत्पादन हुने छ ।

आयोजनाबाट उत्पादन हुने बिजुली २० किलोमिटर टाढा रहेको रुकुमको वाफियाकोट १३२ केभी सवस्टेशनमा जोडिने प्रस्ताव गरिएको छ । नदीमा १० प्रतिशत पानी छाड्ने व्यवस्था गरिएको छ ।आयोजना रुकुम पूर्वको पुथा उत्तरगंगा गाउँपालिकामा पर्छ । एक्सपर्ट हाइड्रो २०७३ सालमा स्थापना भएको कम्पनी हो ।

प्रकाशित मिति: मंगलबार, भदौ २८, २०७९ ०७:३९

प्रतिक्रिया दिनुहोस्