साहस ऊर्जाले बनाएको सोलु दूधकाेशी आयोजनाबाट बिजुली उत्पादन सुरु

पूर्वाधार

गृहपृष्ठ
पूर्वाधार

साहस ऊर्जाले बनाएको सोलु दूधकाेशी आयोजनाबाट बिजुली उत्पादन सुरु

क्यापिटल नेपालबुधबार, पुस २७, २०७९

काठमाडौं। साहस ऊर्जा लिमिटेडले निर्माण गरेको ८६ मेगावाटको सोलुखोला दूधकाेशी आयोजनाबाट बुधबारदेखि परीक्षण विद्युत उत्पादन सुरु भएको छ। परीक्षण पूरा भएपछि व्यापारिक उत्पादन सुरू हुने साहस ऊर्जाका अध्यक्ष हिमप्रसाद पाठकले जानकारी दिए।

सोलु दूधकाेशी निजी क्षेत्रबाट निर्माण सम्पन्न भएको सबैभन्दा ठूलो तथा नेपालको अहिलेसम्मको तेस्रो ठूलो जलविद्युत आयोजना हो। आयोजनाबाट उत्पादन भएको बिजुली प्रशारण लाइनमार्फत नेपाल विद्युत प्राधिकरणको लमाने सबस्टेसनमार्फत राष्ट्रिय प्रणालीमा जोडिने छ।

आयोजना निर्माणका लागि निर्माणाधीन अवस्थामा हुने ब्याज खर्चसमेत गरी ११ अर्ब ८६ करोड रुपैयाँ अनुमान गरिएको छ। आयोजनाको प्रतिमेगावाट लागत १३ करोड ७९ हजार रुपैयाँ रहेको छ।

जलविद्युत आयोजनाको लागत बढेर प्रतिमेगावाट २० करोड रुपैयाँ पुगेको छ। तर, सोलुखोला दूधकोशीको धेरै कम छ। लागतको हिसाबले सोलुखोला दूधकोशी सस्तो आयोजना भएको छ।

कुल लगानी रकममध्ये कम्पनीले ३ अर्ब ५० करोड रुपैयाँ स्वपुँजीबाट र बाँकी रकम बैंकको ऋणबाट लगानी गरेकाे छ। आयोजनाको प्रमुख पानीको स्रोत सोलुखुम्बुको सोलुदूधकुण्ड नगरपालिका र थुलुङदूधकोशी गाउँपालिकालगायत गाउँपालिका भएर बग्ने सोलु खोलाको पानी रहेको छ।

आयोजनाको सिभिल निर्माणको काम सिई कन्स्ट्रक्सन, हाइड्रोमेकानिकल र इलेक्ट्रोमेकानिकल उपकरण आपूर्तिको ठेक्का भ्वाइथ हाइड्रोले गरेको हाे। परामर्शदाता हाइड्रो कन्सल्ट हो। आयोजनाबाट वार्षिक ५२ करोड युनिट बिजुली उत्पादन हुनेछ। नदी प्रवाहमा आधारित (आरओआर) प्रकृतिको हो।

प्रकाशित मिति: बुधबार, पुस २७, २०७९ १९:४०

प्रतिक्रिया दिनुहोस्