रूपवती रारा...(फाेटाे फिचर)

फोटो फिचर

गृहपृष्ठ
फोटो फिचर

रूपवती रारा...(फाेटाे फिचर)

क्यापिटल नेपाल शनिबार, माघ २१, २०७९

काठमाडौं। कर्णाली अञ्चल मुगु जिल्लामा रहेको राराताल मुलुककै सबैभन्दा ठूलो र प्रसिद्ध ताल हो। राराताल छायानाथ रारा नगरपालिकामा पर्दछ।समुद्र सतहबाट २ हजार ९ सय ७२ मिटर उचाइमा अवस्थित राराताल वरिपरि विस्तारित रारा राष्ट्रिय निकुञ्ज १ सय ६ वर्ग किलोमिटर क्षेत्रफलमा फैलिएको छ।

रारा राष्ट्रिय निकुञ्जभित्र पर्ने रारातालको लम्बाइ पाँच किलोमिटर, चौडाइ करिब तीन किलोमिटर र गहिराइ १ सय ६७ मिटर छ। प्राकृति ताल रारालाई निकुञ्जको मनोरम हरियाली साथै कस्तुरी, रतुवाजस्ता वन्यजन्तु, राष्ट्रिय चरा डाँफे र अन्य चराचुरुङ्गीले समेत थप शोभा थपेका छन् । ‘रारा’ शब्दको अर्थ ‘आकासको तारा’ र ‘स्वर्गकी अप्सरा’ हुन् तर धर्तीको चाहिँ रारा।

रारा राष्ट्रिय निकुञ्जबीचको घनाजंगलको काखमा बसेको राराताल नेपालको मुख्य पर्यटकीय गन्तव्यका रूपमा परिचित छ। सिस्ने र काञ्जिरोवा हिमाल रारामै आएर बस्दा वर्णन गर्ने शब्द अभाव पर्छ।

राराबाट पश्चिमतर्फ तीन घन्टा पैदल यात्रा गरेपछि पुगिने मुर्माटपबाट राराको मनोरम दृश्य र सैपाल हिमाल अवलोकन गर्न पाइन्छ। रारातालमा सिस्ने हिमाल र काञ्जिरोवा हिमालको मनोरम दृश्य देखिनुका साथै अन्यत्र कतै नपाइने ’असला’ जातका माछा पाइन्छ। रारातालमा निलो पानी छ।

मुगु सदरमुकाम गमगढीबाट पश्चिमतर्फ करिब तीन घन्टा पैदल यात्रा गरेपछि राराताल पुगिन्छ। यस क्षेत्रको पहिलो पर्यटकीय गन्तव्य रहेको रारा पुग्न काठमाडौंबाट जिप, बस तथा मोटरसाइकलमा तीन दिन लाग्छ। रारा पुग्न हवाई सेवाको पनि सुविधा उपलब्ध छ। नेपालगन्जबाट जहाजमा मुगुको ताल्चा विमानस्थल झरेर करिब दुई घन्टा हिँडेपछि रुपवती राराताल पुग्न सकिन्छ।