बैंकिङ

जगदुल्ला अर्धजलासय आयोजनाको पिपिए, निफ्राको अगुवाइमा १७ अर्ब लगानी

क्यापिटल नेपाल बिहीबार, वैशाख २८, २०८०

काठमाडौं । जगदुल्ला हाइड्रोपावर कम्पनी लिमिटेडले अघि बढाएको १०६ मेगावाटको जगदुल्ला अर्धजलासय आयोजनाको विद्युत खरिद सम्झौता (पिपिए) भएको छ। नेपाल विद्युत प्राधिकरण र प्रवर्द्धक कम्पनी जगदुल्लाबीच बुधबार पिपिए सम्झौता भएको हो।

प्राधिकरणका कार्यकारी निर्देशक कुलमान घिसिङ र कम्पनीका तर्फबाट प्रमुख कार्यकारी अधिकृत (सिइओ) सञ्जय सापकोटाले हस्ताक्षर गरेका छन्।

प्राधिकरणले हिउँदको ६ महिनामा प्रतियुनिट ८.४० रुपैयाँमा र पिक आवरमा उत्पादित विद्युत प्रतियुनिट १०.५५ रुपैयाँमा खरिद गर्ने सम्झौता भएको छ। बर्खायामको विद्युत भने नदी प्रवाही आयोजना सरह प्रतियुनिट ४.८० रुपैयाँका दरले खरिद गर्ने कम्पनीले जनाएको छ।

आयोजना बनाउन २४ अर्ब १७ करोड रुपैयाँ लागत अनुमान गरिएको छ। आयोजनामा निफ्राको अगुवाईमा हाइड्रो इलेक्ट्रिसिटी इन्भेष्टमेन्ट एण्ड डेभपलमेन्ट कम्पनी लिमिटेड(एचआईडिसिएल, कर्मचारी सञ्चय कोष र नबिल बैंकले ऋण लगानी गर्ने सहमति गरीसकेका छन्।

याे पनि पढ्नुहाेस्

जगदुल्ला जलविद्युत् आयोजनाको निर्माण आगामी वर्षदेखि, २० अर्ब लाग्ने

कूल लागतको ७० प्रतिशत हुन आउने १६ अर्ब ९२ करोड रुपैयाँ बैंक तथा वित्तीय संस्थाबाट ऋण जुटाइने जगदुल्लाले जनाएको छ। ३० प्रतिशत स्वपुँजी (इक्विटी) ७ अर्ब २५ करोड रुपैयाँ जुटाइने भएको छ।

जगदुल्लाको विस्तृत अध्ययन पूरा प्रतिवेदन (डिपिआर) तयार भइसकेको । आयोजनाको निर्माण २०८६ भित्र सम्पन्न गर्ने लक्ष्य छ। आयोजनाबाट वार्षिक ६२ करोड३४ लाख ७ हजार युनिट बिजुली उत्पादन हुनेछ ।

याे पनि पढ्नुहाेस्

जगदुल्ला जलविद्युत् आयोजनाको काम धमाधम, लगानी जुटाउन बैंकहरुसँग छलफल

वर्षायाममा ४३ करोड र हिउँदयाममा १९ करोड ३२ लाख ४ हजार युनिट बिजुली उत्पादन हुनेछ अध्ययनले देखाएको छ। कम्पनीले ८२ मेगावाटको जगदुल्ला ‘ए’ आयोजना पनि अघि बढाएको छ।