माथिल्लो सान्जेनबाट विद्युत् उत्पादन सुरु, बिजुली बेचेर ४० करोड कमाउने

पूर्वाधार

गृहपृष्ठ
पूर्वाधार

माथिल्लो सान्जेनबाट विद्युत् उत्पादन सुरु, बिजुली बेचेर ४० करोड कमाउने

क्यापिटल नेपालमंगलबार, साउन २३, २०८०

रसुवा। सान्जेन जलविद्युत् कम्पनी लिमिटेडले निर्माण गरेको माथिल्लो सान्जेन जलविद्युत् केन्द्रबाट विद्युत् उत्पादन सुरू भएको छ। १४.८ मेगावाट क्षमताको उक्त जलविद्युत् आयोजनाबाट यही साउन २० गतेदेखि उत्पादन हुन थालेको हो।

उत्पादित विद्युत् राष्ट्रिय प्रसारण लाइनमा जोडिएको छ। कम्पनीका प्रबन्ध निर्देशक सुनिलकुमार ढुङ्गेलका अनुसार सन् २०१३ देखि निर्माण सुरू भएको हो। सुरु भएको एक दशकमा आयोजना सम्पन्न भएको छ।

विद्युत् उत्पादनका लागि समुन्द्र सतहबाट दुई हजार तीन सय ५० मिटरको उचाइ तिलुचे बगरमा बाधबाँधी एक हजार तीन सय मिटर भूमिगत सुरूङ एवं एक सय ५६ मिटर पेनस्टक पाइपको सहायताले प्रतिसेकेण्ड ११ दशमलव छ घनमिटर पानी सिम्बू गाउँको पुछारमा निर्मित विद्युत् गृहमा पुर्याएको छ।

तीन वटा फ्रान्सिस टरवाइनमार्फत वार्षिक ८ करोड ८५ लाख युनिट विद्युत् उत्पादन हुने र आयोजनाबाट वार्षिक ४० करोड रुपैयाँ हुने प्रबन्ध निर्देशक ढुङ्गेलले बताए।

विद्युत्गृह रहेको स्थान समुन्द्र सतहदेखि दुई हजार एक सय ८० मिटरको उचाइमा छ। यो आयोजना सम्पन्न भएसँगै अब रसुवाको जल सम्पदाले १ सय ८ मेगावाट विद्युत् उत्पादन गराएको छ।

यसभन्दा अगाडि विसं २०६० मा २२ मेगावाट क्षमताको चिलिमे, विसं २०७१ मा पाँच मेगावाट क्षमताको मैलुङ्खोला र विसं २०७६ मा ६० मेगावाट क्षमताको माथिल्लो त्रिशूली थ्रि–ए जलविद्युत् केन्द्रबाट उत्पादन भएको छ। रासस

प्रकाशित मिति: मंगलबार, साउन २३, २०८० २०:०२

प्रतिक्रिया दिनुहोस्