ह्याप्पी इनर्जीले ४० मेगावाटको संखुवासभा खोला आयोजना बनाउने, ५ वर्षमा सक्ने लक्ष्य

पूर्वाधार

गृहपृष्ठ
पूर्वाधार

ह्याप्पी इनर्जीले ४० मेगावाटको संखुवासभा खोला आयोजना बनाउने, ५ वर्षमा सक्ने लक्ष्य

क्यापिटल नेपालबिहीबार, भदौ ७, २०८०

काठमाडौं। निजी क्षेत्रबाट स्थापना भएको ह्याप्पी इनर्जी प्रालिले ४० मेगावाट क्षमताको संखुवासभा जलविद्युत आयोजना बनाउने भएको छ।

कम्पनीले आयोजना बनाउनका लागि विद्युत विकास विभागमा निवेदन दिएको छ। विभागले पनि आउँदो ३५ दिनभित्र कम्पनीलाई विद्युत उत्पादन अनुमतिपत्र (लाइसेन्स) दिने प्रक्रिया अघि बढाएको छ।

नदी प्रवाहमा आधारित (आरओआर) आयोजनाबाट वार्षिक २३ करोड ५४ लाख युनिट बिजुली उत्पादन हुने कम्पनीले गरेको विस्तृत आयोजना प्रतिवेदन (डिपिआर) ले देखाएको छ। आयोजना आउँदो २०८५ जेठ ३० गते विद्युत उत्पादन गर्ने लक्ष्य लिइएको छ। विभागले आयोजनाको डिपिआर स्वीकृत गरेको छ।

आयोजनामा डिजाइन वहाव ९.६१ मिटर प्रतिसेकेन्ड छ। आयोजनाको कुल उचाइ (हेड) ५ सय १६ मिटर रहेको ह्याप्पी इनर्जीले जनाएको छ।

आयोजनाको मुख्य संरचना लुनसुन खोला र संखुवासभा खोलाको बाँयाँ किनारमा पर्छ। बाँधको उचाइ ७ मिटर अग्लो बनाउने प्रस्ताव गरिएको छ। आयोजनामा २ वटा भर्टिकल एक्सिस पेल्र्टन टर्वाइन जडान हुने भएको छ।

आयोजनाबाट उत्पादन हुने बिजुली विद्युतगृहबाट १९ किलोमिटर टाढाको दुरीमा रहेको २ सय २० केभी क्षमताको प्रसारण लाइनमार्फत नेपाल विद्युत प्राधिकरणको शीतलपाटी सबस्टेशनमा जोडिने छ। आयोजना सिलिचोङ गाउँपालिकामा पर्छ।

प्रकाशित मिति: बिहीबार, भदौ ७, २०८० ०७:३६

प्रतिक्रिया दिनुहोस्