उद्योगसचिव मधुकुमार मरासिनी स्वतः निलम्बनमा

समाज

गृहपृष्ठ
समाज

उद्योगसचिव मधुकुमार मरासिनी स्वतः निलम्बनमा

क्यापिटल नेपाल सोमबार, असोज १५, २०८०

काठमाडौं। राष्ट्रिय पेमेन्ट गेटवे खरिदमा करोडौं रुपैयाँ भ्रष्टाचार गरेको अभियोगमा उद्योग वाणिज्य तथा आपूर्ति मन्त्रालयका सचिव मधुकुमार मरासिनीसहित ७ जनाविरुद्ध भ्रष्टाचार मुद्दा दायर भएको छ। विशेष अदालतमा भ्रष्टाचार मुद्धा दायर भएपछि उद्योगसचिव मरासिनीसहित नेपाल टेलिकमका प्रबन्ध निर्देशक सुनिल पौडेल स्वतः निलम्बनमा परेका छन्।

पेमेन्ट गेटवे खरिदमा २३ करोड २७ लाख रुपैयाँ भ्रष्टाचार गरेको आरोपमा अख्तियार दुरुपयोग आयोगले सोमबार विशेष अदालतमा मुद्दा दायर गरेको हो। सचिव मरासिनी अर्थ मन्त्रालय बजेट महाशाखा प्रमुख हुँदा गरेको निर्णयका आधारमा अख्तियारले मुद्धा दायर गरेको हो।

सचिव मरासिनीसहित राष्ट्रिय सूचना प्रविधि केन्द्रका तत्कालीन कार्यकारी निर्देशक प्रणिता उपाध्याय, नेपाल टेलिकमका प्रबन्ध निर्देशक सुनिल पौडेल, पूर्वसचिव एवं राष्ट्रिय सूचना प्रविधि केन्द्र (एनआईटीसी) का तत्कालीन कार्यकारी निर्देशक सञ्जय शर्मासहित ७ जनाविरुद्ध मुद्दा दायर गरेको अख्तियारका प्रवक्त प्रवक्ता भोला दाहालले बताए।

मिलेमतो तथा योजनामा अर्थ मन्त्रालयका बजेट तथा कार्यक्रम महाशाखाका तत्कालीन महाशाखा प्रमुख मरासिनीले नीति तथा कार्यक्रममा समावेश नभएको तथा राष्ट्रिय सूचना प्रविधि केन्द्रले बजेट माग नगरेको नेशनल पेमेन्ट गेटवे खरिदका लागि २५ करोड रुपैयाँ निकासी गरेर भ्रष्टाचार गरेको प्रवक्ता दाहालले जानकारी दिए।

प्रकाशित मिति: सोमबार, असोज १५, २०८० १४:४०

प्रतिक्रिया दिनुहोस्