सर्लाहीका उखु किसानलाई अनुदानबापतको रकम बाँडियो

कृषि

गृहपृष्ठ
कृषि

सर्लाहीका उखु किसानलाई अनुदानबापतको रकम बाँडियो

क्यापिटल नेपालबिहीबार, पुस १९, २०८०

सर्लाही। सर्लाहीका उखु उत्पादक किसानले एक वर्षपछि अनुदानबापतको रकम प्राप्त गरेका छन्। जिल्लाका उखु उत्पादक किसानको खातामा अनुदानबापतको रकम प्राप्त भएको नेपाल उखु उत्पादक महासंघ अध्यक्ष कपिलमुनि मैनालीले जानकारी दिए।

जिल्लाका उखु उत्पादक किसानले पटक–पटक आन्दोलन गरेपछि सरकारले अनुदानबापतको २९ करोड २५ लाख ५२ हजार सात सय ४९ खातामा पठाएको मिलगेट उखु उत्पादक किसान समिति सर्लाहीका अध्यक्ष राजकुमार उप्रेतीको भनाइ छ।

उनका अनुसार गत वर्ष उखुको मूल्य प्रतिक्विन्टल अनुदानसहित ६ सय १० निर्धारण गरिएको थियो। यसमा पाँच सय ४० चिनी मिल र ७० सरकार उपलब्ध गराउने निर्णय भएको थियो।

जिल्लाका उखु उत्पादक किसानका लागि वितरण गर्न बाँकी २९ करोड २५ लाख ५२ हजार सात सय ४९ मध्ये सरकारले दसैंअघि ११ करोड २६ हजार ६ सय ३८ निकासा गरेको थियो।

बाँकी अनुदान रकम सरकारले पठाएपछि उखु उत्पादक किसानको बक्यौता रहेको प्रतिक्विन्टल ४९ का दरले किसानको खातामा पठाइएको कोष तथा लेखा नियन्त्रक कार्यालय सर्लाहीका प्रमुख एवं कोष नियन्त्रक निर्मल न्यौपानेले जानकारी दिए।

उनले किसानलाई अनुदान रकम खातामा आएको वा नआएको बुझ्न आग्रह समेत गरिएको बताए। सरकारले यस वर्षका लागि उखुको मूल्य प्रतिक्विन्टल ६ सय ३५ निर्धारण गरेको छ।

चिनी उद्योगीले प्रतिक्विन्टल पाँच सय ६५ र सरकारले ७० गरी प्रतिक्विन्टल ६ सय ३५ उखु उत्पादक किसानलाई उपलब्ध गराउने निर्णय हो। यस वर्ष मधेस प्रदेश सरकारले प्रतिक्विन्टल १० रुपैयाँ अनुदान दिने घोषणा गरिसकेको छ।–रासस

प्रकाशित मिति: बिहीबार, पुस १९, २०८० १९:००

प्रतिक्रिया दिनुहोस्