दोलखाको कालिञ्चोक र शैलुङमा हिउँ पर्यो

पर्यटन

गृहपृष्ठ
पर्यटन

दोलखाको कालिञ्चोक र शैलुङमा हिउँ पर्यो

क्यापिटल नेपाल मंगलबार, माघ २, २०८०

काठमाडौं। दोलखाको कालिञ्चोक र शैलुङमा हिमपात भएको छ। मंगलबार दिउँसोबाट हिउँ पर्न सुरु भएसँगै हिउँ खेल्न जानेहरुको चहलपहल सुरु भएको होटल व्यवसायीहरुको भनाई छ। तीन हजार आठ सय ४२ मिटर उँचाईमा रहेको कालिञ्चोकमा मंगलवार दिउँसो करिब एक बजेबाट हिमपात सुरु भएको हो।

कालिञ्चोक कन्ट्रि भिल्लाका सञ्चालक नोर्बु लामाले हिउँ खेल्न आउनेहरुको संख्या क्रमिक रुपमा बढ्न थालेको बताए। लामो समयपछिको प्रतिक्षापछि कालिञ्चोकमा हिउँ परेको हो। हिउँ परेसँगै दोलखा सहित आसपासका जिल्ला र काठमाडौंबाट समेत कालिञ्चोक क्षेत्रमा जाने गरेका छन्। अहिले हिउँ पर्न सुरु गरेसँगै खेल्न आउनेहरुले सोधखोज गर्न लागेको उनले बताए।

गत बर्ष फागुनमा मात्र हिमपात सुरु भएकोमा यो वर्ष माघको पहिलो साता नै परेकोपछि चहलपहल बढ्ने आशा सुनपाती होटल कुरीका सञ्चालक एवं पर्यटन व्यवसायी हरि ओलीको भनाई छ। यो बर्ष माघको सुरुबाटै हिमपात भएकाले पर्यटन आगमनमा बृद्धि हुने अपेक्षा गर्न सकिन्छ, उनले भने।

योसँगै दोलखाकै अर्को महत्वपूर्ण पर्यटकीय गन्तव्य शैलुङमा पनि हिमपात भएको स्थानीयले बताएका छन्। पछिल्लो समय शैलुङमा स्वदेशी तथा विदेशी पर्यटकको संख्यामा निक्कै बृद्धि भएको शैलुङ क्षेत्रमा हिमपात पछि यो संख्या अझ बढ्ने स्थानीय व्यवसायीहरु बताउछन्।

प्रकाशित मिति: मंगलबार, माघ २, २०८० १७:५८

प्रतिक्रिया दिनुहोस्