बालकुमारी घटना : छानबिन समितिको प्रतिवेदन हेरी आवश्यक कारबाही हुने प्रधानमन्त्रीको भनाइ

समाज

गृहपृष्ठ
समाज

बालकुमारी घटना : छानबिन समितिको प्रतिवेदन हेरी आवश्यक कारबाही हुने प्रधानमन्त्रीको भनाइ

क्यापिटल नेपाल आइतबार, फागुन ६, २०८०

काठमाडौं। प्रधानमन्त्री पुष्पकमल दाहाल प्रचण्डले बालकुमारी घटनाको प्रतिवेदनका बारेमा मन्त्रीपरिषदमा छलफल हुने बताएका छन्।

आइतबारको प्रतिनिधि सभा बैठकमा विपक्षि दलहरुले मन्त्री ज्वालालाई पदबाट हटाउन माग गरेपछि प्रधानमन्त्री दाहालले यस विषयमा छलफल हुने बताएका हुन्।

संसदको प्रश्नोत्तर कार्यक्रममा बोल्दै प्रधानमन्त्री दाहालले भने, ‘सरकारले १० लाख दिएर त्यसै चुप लाग्यो भन्ने होइन, आजै क्याबिनेट छ। छानबिन समितिले बुझाएको प्रतिवेदन हेरेर आवश्यक कारबाही हुन्छ।’

पुस १३ मा कोरियन भाषा परीक्षाको विषयमा ललितपुरको बालकुमारीमा प्रदर्शन भइरहेको थियो। प्रदर्शन चलिरहेको बेला मन्त्री ज्वाला पार्टीको बैठकमा सहभागी हुन बालकुमारीको बाटो प्रयोग गरेका थिए। प्रदर्शनकारीले मन्त्री ज्वाला चढेको गाडीमा आगो लगाएका थिए भने प्रहरीले गोली चलाउँदा २ युवाको ज्यान गएको थियो।

ललितपुरको बालकुमारी घटनामा जाँचबुुझ आयोगले भौतिक मन्त्री ज्वालासहित तीनजना दोषी भएको निष्कर्ष निकालेको छ। आयोगले शुक्रबार उपप्रधान तथा गृहमन्त्री नारायणकाजी श्रेष्ठलाई बुझाएको प्रतिवेदनमा मन्त्री ज्वाला प्रदर्शन भइरहेको ठाउँमा पुग्दा मानवीय क्षतिको घटना हुन पुगेको उल्लेख छ।

आयोगले प्रदर्शन र हुलहुज्जत भइरहेको गलत ठाउँमा सुरक्षा व्यवस्थाको एकिन नगरी विभागीय मन्त्री पुग्नु मुख्य कमजोरी रहेको जनाएको छ। त्यस्तै बालकुमारीमा घटना हुँदा फिल्ड कमान्डरको जिम्मेवारीमा रहेका नेपाल प्रहरीका डीएसपी उमेश लम्साल र मन्त्री ज्वालाका पीएसओ सई बोधराज दनुवार पनि दोषी भएको छानबिन आयोगले जनाएको छ।

प्रकाशित मिति: आइतबार, फागुन ६, २०८० १३:१६

प्रतिक्रिया दिनुहोस्