फागुन २४ गतेदेखि ‘चेम्बर एक्स्पो २०२४’

कर्पोरेट बजार

गृहपृष्ठ
कर्पोरेट बजार

फागुन २४ गतेदेखि ‘चेम्बर एक्स्पो २०२४’

क्यापिटल नेपालआइतबार, फागुन २०, २०८०

काठमाडौं। सातौं चरणको ‘चेम्बर एक्स्पो २०२४’ फागुन २४ गतेदेखि हुने भएको छ। नेपाल चेम्बर अफ कमर्सले आयोजना गर्दै आएको एक्स्पो काठमाडौंको भृकुटीमण्डपमा हुने भएको हो। स्थानीय उत्पादन प्रबर्द्धन एवं बजारीकरण तथा व्यापार अभिवृद्धि गर्ने उद्देश्यले चेम्बर एक्स्पो हुन लागेको हो। उद्योग वाणिज्य तथा आपूर्ति मन्त्रालय अन्तर्गतको व्यापार तथा निकासी प्रवद्र्धन केन्द्रको सहकार्यमा हुने एक्स्पोको ‘फोकस कन्ट्री’को रुपमा दक्षिण कोरिया रहने छ।

नेपाली उत्पादनको बजारीकरणमा जोड दिएर व्यावसायिक क्षेत्रहरूलाई एकीकृत गर्ने उद्देश्य समेत रहेको चेम्बर अफ कमर्सले जानकारी दिएको छ। क्षेत्रीय एवं अन्तर्राष्ट्रिय व्यापारिक समुदायको प्रत्यक्ष सहभागिताले अन्तर्राष्ट्रिय क्षेत्रमा भइरहेका आर्थिक गतिविधि, नविन प्रविधिको प्रयोग एवं व्यापार व्यवस्थापनका नयाँ आयाम नजिकबाट नियाल्न सहयोग पुग्ने विश्वास लिइएको चेम्बरको भनाइ छ। एक्स्पोमा इन्डियन चेम्बर अफ कमर्सको नेतृत्वमा भारत आयुष एक्जिविशन कन्फरेन्स पनि हुने आयोजकले बताएको छ।

एक्स्पोमा नेपालमा रहेको रूसी दुतावासको वाणिज्य शाखा र मलेसियन दूतावासको वाणिज्य शाखाको पनि सहभागिता रहनेछ। त्यस्तै बंग्लादेश, भारत, दक्षिण कोरिया, पाकिस्तानका व्यवसायी पनि एक्स्पोमा सहभागी हुनेछन्।
एक्स्पोमा हस्तकलाका वस्तु, घरजग्गा व्यवसायी, खाद्य एवं पेय पदार्थ, पहिरन, पाठ्यपुस्तक, सवारी साधन, निमार्ण सामग्री, साना तथा घरेलु उद्योगका उत्पादन, विद्युतीय उपकरणलगायत प्रदर्शनी गरिने छन्। नेपाल चेम्बर एक्स्पो २०२४ मा सिल्भर स्पोन्सरका रुपमा एनसेल रहेको छ भने अफिसियल इन्स्योरेन्स पार्टनरका रुपमा सगरमाथा लुम्बिनी इन्स्योरेन्स रहेको छ। एक्स्पो फागुन २८ गतेसम्म हुनेछ।

प्रकाशित मिति: आइतबार, फागुन २०, २०८० १६:३०

प्रतिक्रिया दिनुहोस्