६ वर्षपछि सुनवालुवा पक्की पुल पुनर्निर्माण थालियो

पूर्वाधार

गृहपृष्ठ
पूर्वाधार

६ वर्षपछि सुनवालुवा पक्की पुल पुनर्निर्माण थालियो

क्यापिटल नेपाल आइतबार, फागुन २७, २०८०

भोजपुर। अलपत्र रहेको भोजपुर र धनकुटा जोड्ने अरुण नदीको सुनवालुवा पक्की पुल पुनर्निर्माण सुरु भएको छ। करिब साढे ६ वर्षदेखि सो पुल निर्माण रोकिएको थियो। यहाँ पक्की पुल निर्माणका लागि विसं २०७३ मा सम्झौता भएर २०७६ सालबाट काम सुरु भएको थियो। यहाँ पिलर उठाएपछि कामले गति लिन सकेको थिएन। तीन ‘इस्पान’मा निर्माण भइरहेको पुलको अहिले भने धनकुटातर्फको इस्पानको ढलानको तयारी गरिएको छ। पहिलो इस्पानको ढलानको तयारीका साथ आवश्यक काम भइरहेको निर्माण कम्पनीले जनाएको छ।

यो इस्पानको रड बिछ्याउने तथा फर्मा राख्ने काम अन्तिम चरणमा पुगेको ‘साइट इन्चार्ज’ नारायण चौधरीले बताए।
निर्माणस्थलमा प्रायः सम्पूर्ण सामग्री आइपुगेको उनको भनाइ छ। व्यारिङ, केवल पाइपलगायत सामान भारतबाट ल्याउनुपर्ने भएकाले त्यो सामग्रीमात्र आउन बाँकी रहेको उनको भनाइ छ। 'हामीले यहाँ पुनः मंसिरबाट काम थालनी गरेका छौँ,' उनले भने, 'अहिले धनकुटातर्फको पहिलो इस्पानको ढलानको तयारी गरेका छौँ। विगतमा कोभिडलगायत कारणले काममा बाधा पुगेको थियो। यो ढलानको काम चाँडै सक्ने लक्ष्य छ।'

फुटपाथसहित ११ मिटर चौडाइ रहेको पुलको कुल लम्बाइ एक सय ८० मिटर रहेको छ। यहाँ भ्याटसहित २२ करोड ७५ लाख २८ हजार सात सय रुपैयाँ लागतमा पुल निर्माण थालिएको हो। पुलको पहिलो इस्पानको लम्बाइ ३७ दशमलव ५५, दोस्रो इस्पानको लम्बाइ ८० मिटर र तेस्रो इस्पानको लम्बाइ ५८ दशमलव ३८ मिटर रहेको छ। हालसम्म १० करोड २९ लाख ११ हजार ६ सय ४२ रुपैयाँ भुक्तानी भएको छ। सुनवालुवामा पुल नहुँदा स्थानीयलाई समस्या रहेको हतुवागढी गाउँपालिकाले जनाएको छ। यो पुललाई समयमा सम्पन्न गराउन गाउँपालिकाले आवश्यक सहयोग गरिरहेको गाउँपालिका अध्यक्ष प्रेमकुमार राईले बताए। रासस

प्रकाशित मिति: आइतबार, फागुन २७, २०८० १०:५२