दक्षिण कोरिया भ्रमणमा जाँदै प्रधानमन्त्री दाहाल

पर्यटन

गृहपृष्ठ
पर्यटन

दक्षिण कोरिया भ्रमणमा जाँदै प्रधानमन्त्री दाहाल

क्यापिटल नेपाल शनिबार, चैत २४, २०८०

काठमाडौं। प्रधानमन्त्री पुष्पकमल दाहाल प्रचण्डले राष्ट्रसंघको महासभाका बेला दक्षिण कोरियाली राष्ट्रपतिसँग भएको भेटवार्तामा आफूलाई निम्ताइएकाले भ्रमणको तयारी भइरहेको बताएका छन्।

शनिबार नेपाल र कोरियाबीच द्विपक्षीय सम्बन्ध स्थापना भएको ५०औं वर्ष अवसरमा जुगल हिमाल आरोहण गर्न लागेको टोलीलाई नेपाली झन्डा हस्तान्तरण गर्दै प्रधानमन्त्रीले कोरिया भ्रमणको तयारी थालिएको जानकारी दिएका हुन्।

प्रधानमन्त्री निवास बालुवाटारमा आज आयोजित कार्यक्रममा प्रधानमन्त्री दाहालले आरोही उम होङ गिलसहितका सदस्यलाई नेपाली झन्डा हस्तान्तरण गरे।

सरकारले जुगल प्रथम (६ हजार पाँच सय ९१ मिटर) र जुगल दोस्रो (६ हजार पाँच सय १८ मिटर) अग्लो हिमाललाई गत वर्षदेखि आरोहणका लागि खुला गरेको हो। प्रधानमन्त्री दाहालले आरोहण दलका सदस्यलाई सफल आरोहणको सफलताको कामना गरेको उनको सचिवालयले जनाएको छ।

उनले यस कदमले नेपाल र दक्षिण कोरियाबीचको मैत्री सम्बन्धलाई थप सुदृढ बनाउने विश्वास व्यक्त गरे। जुगल हिमाल आरोहणबाट पर्यटन प्रवर्द्धनमा ठूलो भूमिका खेल्ने उल्लेख गर्दै प्रधानमन्त्री दाहालले नेपाल र दक्षिण कोरियाबीच सहयोगका विविध क्षेत्रमा भइरहेका प्रगतिको प्रशंसा गरे।

सो अवसरमा नेपालका लागि दक्षिण कोरियाली राजदूत पार्क तेई योङ, प्रतिनिधिसभा सदस्य माधव सापकोटा, बागमती प्रदेशसभा सदस्य सरल सहयात्री पौडेल, नेपाल पवर्तरोहण संघका प्रतिनिधि, पर्यटन बोर्डका पदाधिकारीलगायत उपस्थित थिए।

प्रकाशित मिति: शनिबार, चैत २४, २०८० १४:४३

प्रतिक्रिया दिनुहोस्