समाज

२ मुद्दा खेपिरहेका मुद्रण केन्द्रका विकलविरुद्ध ४० करोड भ्रष्टाचारको अर्को मुद्दा

क्यापिटल नेपालआइतबार, वैशाख ३०, २०८१

काठमाडौं। अख्तियार दुरुपयोग अनुसन्धान आयोगले सुरक्षण मुद्रण केन्द्रको उपकरण खरिद गर्दा ४० करोड बढी भ्रष्टाचार भएको दाबीसहित केन्द्रका तत्कालीन कार्यकारी निर्देशक विकल पौडेलसहित ३ जनाविरुद्ध विशेष अदालत काठमाडौंमा मुद्दा दायर गरेको छ।

आज दायर मुद्दासहित पौडेलविरुद्ध अख्तियारले विशेष अदालतमा तेस्रो पटक भ्रष्टाचार आरोपपत्र दायर गरेको हो। अख्तियारले पौडेलमाथि ४० करोड ८५ लाख रुपैयाँ भ्रष्टाचार गरेको आरोपपत्रमा उल्लेख छ।

पौडेलसहित राष्ट्रिय सूचना प्रविधि केन्द्रका तत्कालीन निर्देशक सफल श्रेष्ठ, वन तथा वातावरण मन्त्रालयका मेकानिकल सीडीई नवीनकुमार पोखरेलविरुद्ध पनि अख्तियारले मुद्दा दायर गरेको छ।

अख्तियारले सुरक्षण मुद्रण केन्द्रका तत्कालीन लेखा अधिकृत खड्कबहादुर थापा र शाखा अधिकृत हरिवल्लभ घिमिरे, केन्द्रको उपकरण खरिद ठेक्का पाएको म्याक्स इन्टरनेसनलका सञ्चालक अकबर हुसेनविरुद्ध पनि भ्रष्टाचारको मुद्दा दायर गरेको छ।

यसअघि केन्द्रको भवन र संरचना निर्माणमा अनियमितता भएको दाबीसहित अख्तियारले गत वर्ष विशेषमा दायर गरेको विचाराधीन छ।

अख्तियारले यसअघि पौडेलले अमेरिकाको पीआर हुँदाहुँदै राजनीतिक नियुक्ति लिएको भन्दै दुई साताअघि पौडेलविरुद्ध मुद्दा दायर गरेको थियो। यो मुद्दामा पौडेलमाथि थप अनुसन्धान गर्न आज मात्रै अख्तियारले विशेषबाट १० दिनको म्याद थप अनुमति पाएको छ।