दुर्घटना छानबिन र उड्डयन प्राधिकरणका नियामक छुट्याउने प्रस्ताव मन्त्रिपरिषद् पुगिसक्यो : मन्त्री पाण्डे

पर्यटन

गृहपृष्ठ
पर्यटन

दुर्घटना छानबिन र उड्डयन प्राधिकरणका नियामक छुट्याउने प्रस्ताव मन्त्रिपरिषद् पुगिसक्यो : मन्त्री पाण्डे

क्यापिटल नेपाल सोमबार, भदौ ३१, २०८१

काठमाडौं । संस्कृति, पर्यटन तथा नागरिक उड्डयनमन्त्री बद्री पाण्डेले हालसम्म भएका हवाई दुर्घटनाबारे छानबिन गर्न उच्चस्तरीय छानबिन समिति गठनको प्रस्ताव तथा नागरिक उड्डयनका क्षेत्रमा नियामक र सेवा प्रदायक निकायलाई छुट्याउने गरी बनेको विधेयक मन्त्रीपरिषद्‍मा पेस भइसकेको बताएका छन्।

सोमबार मन्त्रालयमा आयोजित पत्रकारसँगको अन्तरक्रियामा मन्त्री पाण्डेले उच्च अदालतका पूर्वन्यायाधीशको संयोकत्वमा उच्चस्तरीय छानिबिन समितिको प्रस्ताव मन्त्रिपरिषद‍्मा प्रवेश भइसकेको बताए। उनले भने, 'हालसम्म भएका विमान दुर्घटनाको विषय क्याबिनेटमा पुगिसकेको छ। उच्च अदालतको पूर्वन्यायाधीशको नेतृत्वमा उच्चस्तरीय छानबिन समिति बन्दै छ।'

उनले हवाई उड्डयनमा नियामक र सेवा प्रदायक निकायलाई छुट्याउने गरी बनेको विधेयक अर्थ, कानुन मन्त्रालय हुँदै हाल मन्त्रिपरिषद्को विधेयक समितिमा पुगेको बताए। मन्त्री पाण्डेले भैरहवा र पोखरा विमानस्थल सञ्चालनका लागि अन्तरमन्त्रालय स्तरमा काम भइरहेको जानकारी दिए।

उनले अहिले प्रस्ताविगत छानबिन समितिमा यसअघिका कार्यदलले बनाएका अध्ययन प्रतिवेदनलाई रिफ्रेन्सका रूपमा लिएर अघि बढ्ने जानकारी गराए। उनले अध्ययनले दिएको प्रतिवेदन कार्यान्वयन हुनेमा विश्वास व्यक्त गरे।

मन्त्री पाण्डेले हवाई दुर्घटनाका विषयमा संसद‍्मा समेत सार्वजनिक महत्त्वको प्रस्ताव दर्ता भएर छलफलसमेत भइसकेको बताए। मन्त्री पाण्डेले मन्त्रालय र मातहतका निकायमा संस्थागत र संरचनागत कुरामा सुधार गर्दै अघि बढिरहेको बताए।

प्रकाशित मिति: सोमबार, भदौ ३१, २०८१ १४:३३