हिउँदे अधिवेशनमा मन्त्रालयसँग सम्बन्धी विधेयक प्रस्तुत हुनेछन्: मन्त्री पाण्डे

पर्यटन

गृहपृष्ठ
पर्यटन

हिउँदे अधिवेशनमा मन्त्रालयसँग सम्बन्धी विधेयक प्रस्तुत हुनेछन्: मन्त्री पाण्डे

क्यापिटल नेपाल मंगलबार, असोज १, २०८१

काठमाडौं । संस्कृति, पर्यटन तथा नागरिक उड्यनमन्त्री बद्री पाण्डेले संसद‍्को हिउँदे अधिवेशनबाट मन्त्रालय सम्बद्ध ऐन संशोधन हुने बताएका छन्।

मंगलबार नेपाल पर्वतारोहण संघको ३४औं वार्षिक साधारण सभालाई सम्बोधन गर्दै मन्त्री पाण्डे हाल संसद् अधिवेशन अन्त्य भएकाले आगामी हिउँदे अधिवेशन अगावै ऐनलाई मूर्त रूप दिने काम हुने विश्वास व्यक्त गरे। मन्त्री पाण्डे भने, 'हिजो मात्रै संसद् अधिवेशन अन्त्य भएको छ। पर्यटन, संस्कृति, हवाई उड्यनलगायतका नीति परिमार्जन गर्न खोजिरहेका छौं। संसद्को हिउँदे अधिवेशन सुरु हुनु अगावै नीतिलाई अन्तिम रूप दिने छौं।'

मन्त्री पाण्डेले नेपाल पर्वतारोहण सम्बन्धी ऐनमा के परिमार्जन गर्न सकिन्छ त्यसबारे सुझाव दिन आग्रह गरेका छन्। उनले नेपाल एयरलाइन्सलाई चलायमान बनाउन जरुरी रहेको समेत बताए।

फरक प्रशंगमा बोल्दै मन्त्री पाण्डेले मुलुकको स्थायित्वका लागि दुई ठूला दल नेपाली कांग्रेस र नेकपा एमाले मिलेर सरकार बनाउनु परेको स्मरण गरे। 'कांग्रेस र एमाले एक ठाउँमा उभिनु सहजता पक्कै होइन, स्वाभाविक पनि छैन। स्थिर सरकार चलाउन एक ठाउँमा उभिएका हौं,' उनले भने।

सरकार २०८४ सम्मै चल्ने र मुलुकको समृद्धि तथा विकासका लागि प्रतिपक्षमा रहेका नेकपा माओवादी, राप्रपालगायत मधेसवादी दलसँग समेत सहकार्य गरेर अगाडि बढ्ने उनले बताए।

प्रकाशित मिति: मंगलबार, असोज १, २०८१ १५:४९

प्रतिक्रिया दिनुहोस्