जीपी कोइराला राष्ट्रिय स्वासप्रश्वास केन्द्र र ट्रमा सेन्टरलाई सुविधासम्पन्न बनाइदिने भारतीय प्रतिबद्धता

पूर्वाधार

गृहपृष्ठ
पूर्वाधार

जीपी कोइराला राष्ट्रिय स्वासप्रश्वास केन्द्र र ट्रमा सेन्टरलाई सुविधासम्पन्न बनाइदिने भारतीय प्रतिबद्धता

क्यापिटल नेपाल सोमबार, असोज २१, २०८१

काठमाडौं। भारत सरकारले तनहुँको शुक्लागण्डकी नगरपालिका बेलचौतारास्थित जीपी कोइराला राष्ट्रिय स्वासप्रश्वास केन्द्रलाई तीन सय शय्या र सुविधासम्पन्न उपकरणसहितको भवन निर्माण थाल्न सम्झौता गर्ने प्रतिबद्धता जनाएको छ।

नयाँ दिल्ली भ्रमणमा रहेका स्वास्थ्य तथा जनसंख्यामन्त्री प्रदीप पौडेल र भारतीय समकक्षी स्वास्थ्य तथा परिवार कल्याणमन्त्री जेपी नड्डाबीच भएको द्विपक्षीय वार्ताका क्रममा भारतले यस्तो प्रतिबद्धता जनाएको हो। नड्डा भारतीय जनता पार्टीका अध्यक्षसमेत हुन्।

वार्तामा मन्त्री पौडेलले प्रस्ताव गरेको ट्रमा सेन्टरको स्तरोन्नति, डायलासिस सेवा थप्न आवश्यक सहयोगमा पनि सघाउने मन्त्री नड्डाले प्रतिबद्धता जनाएको मन्त्री पौडेलको सचिवालयले बताएको छ।

यसैगरी सर्पदंशका बिरामीको उपचार र डिजिटल हेल्थ अभियान कार्यान्वयनका लागि सघाउन मन्त्री पौडेलले गरेको आग्रहमा पनि भारतीय समकक्षी नड्डाले सघाउने प्रतिबद्धता जनाएका छन्।

अब केही समयमा यसबारे दिव्पक्षीय समझदारी गर्ने सहमति भएको स्वास्थ्य मन्त्रालयका स्वास्थ्य सेवा विभागका महानिर्देशक डा. विकास देवकोटाले जानकारी दिए। मन्त्री पौडेलले नेपाल भ्रमणका लागि दिएको निम्तोसमेत भारतीय समकक्षी नड्डाले स्वीकारेका छन् ।

विश्व स्वास्थ्य संगठनको क्षेत्रीय सम्मेलनका लागि भारत रहेका स्वास्थ्यमन्त्री पौडेलले आज साँझ सम्बोधन गर्ने कार्यक्रम रहेको उनको सचिवालयले जनाएको छ।

प्रकाशित मिति: सोमबार, असोज २१, २०८१ १७:३५

प्रतिक्रिया दिनुहोस्