ग्लोबल आइएमई बैंकको वार्षिकोत्सवमा ३५ छात्रालाई छात्रवृत्ति वितरण

कर्पोरेट बजार

गृहपृष्ठ
कर्पोरेट बजार

ग्लोबल आइएमई बैंकको वार्षिकोत्सवमा ३५ छात्रालाई छात्रवृत्ति वितरण

क्यापिटल नेपाल शनिबार, पुस १३, २०८१

काठमाडौं। ग्लोबल आइएमई बैंकले १८औं वार्षिकोत्सव अवसरमा संस्थागत सामाजिक उत्तरदायित्वअन्तर्गत ‘ग्लोबल आइएमई छात्रालाई छात्रवृत्ति कार्यक्रम’लाई निरन्तरता दिएको छ। बैंकले आगामी पुस १८ मा स्थापनाको १८ वर्ष पूरा गरी १९औं वर्ष प्रवेश गर्दै छ।

ग्लोबल आइएमई छात्रालाई छात्रवृत्ति कार्यक्रमअन्तर्गत बैंकले विभिन्न सामुदायिक तथा सरकारी विद्यालयबाट कक्षा ६ उत्तीर्ण गरी कक्षा ७ मा प्रवेश गरेका विपन्न ३५ जेहेनदार छात्रालाई छात्रवृत्ति वितरण गरेको हो।

बैंकले यी छात्रालाई कक्षा १२ सम्म अध्ययनका लागि हरेक वर्ष छात्रवृत्ति उपलब्ध गराउनेछ।

कार्यक्रमअन्तर्गत बैैंकले प्रत्येक प्रदेशबाट ५ जना जेहेनदार छात्रा छनोट गरी ३५ जना छात्रालाई वर्षको १२ हजार रुपैयाँका दरले छात्रवृत्ति प्रदान गर्नेछ। अहिलेसम्म १४० जनालाई उक्त छात्रवृत्ति वितरण गरिसकिएको बैंकले जनाएको छ।

समाज विकासमा शिक्षाको महत्त्वपूर्ण भूमिका रहेको र महिला शिक्षित भए समाजको चेतनास्तर अभिवृद्धि हुनुका साथै आर्थिक रुपमा सबल हुन मद्दत पुग्ने हुनाले कार्यक्रम गरिएको बैंकले बताएको छ।

हाल बैंकले ३५४ शाखा, ३८४ एटिएम, २३७ शाखारहित बैंकिङ इकाइ, ६८ एक्सटेन्सन तथा राजस्व संकलन काउन्टर तथा ३ वटा वैदेशिक प्रतिनिधि कार्यालयबाट बैंकिङ सेवा दिँदै आएको छ।

प्रकाशित मिति: शनिबार, पुस १३, २०८१ १३:४७

प्रतिक्रिया दिनुहोस्