सहकारी पीडितको रकम पीडकबाटै परिपूरण गर्न कांग्रेसको माग

राजनीति

गृहपृष्ठ
राजनीति

सहकारी पीडितको रकम पीडकबाटै परिपूरण गर्न कांग्रेसको माग

क्यापिटल नेपाल सोमबार, माघ १४, २०८१

काठमाडौं। नेपाली कांग्रेस संसदीय दलको बैठकमा सांसदले सहकारी पीडितको रकम पीडकबाटै परिपूरण गराउनुपर्नेमा जोड दिएका छन्।

बानेश्वरस्थित संसद् भवनमा बसेको आजको बैठकमा सांसदले सहकारी पीडितलाई दिनुपर्ने रकम धेरै परिमाणमा रहेको र राज्यले दिन नसक्ने अवस्था भएकाले सहकारीको रकम अपचलन गर्नेबाटै भराउनुपर्ने माग गरेका हुन्।

बैठकपछि संसदीय दलका मुख्य सचेतक श्यामकुमार घिमिरेले सोही भावनाअनुसार सहकारीसम्बन्धी अध्यादेश ल्याइएको जानकारी गराउँदै उक्त अध्यादेशले सहकारी पीडितका समस्या हल गर्ने विश्वास व्यक्त गरे।

वर्तमान सरकार गठनका लागि भएको साझेदारीअनुसार नेपाली कांग्रेस र नेकपा एमालेबीच भएको सात बुँदे सहमतिअनुसार सरकार अघि बढ्ने उनले बताए। बैठकमा पार्टीका तर्फबाट सरकारमा सहभागी मन्त्री र सरकारले गरेका कामकारबाहीका बारेमा सांसदले बैठकमा कुरा राखेका थिए।

माघ १८ गते बिहान साढे ८ बजेसम्मका लागि संसदीय दलको बैठक स्थगित गरिएको पनि मुख्य सचेतक घिमिरेले सुनाए। संसदीय दलको बैठकमा समसामयिक राजनीतिक विषयमा छलफल जारी छ।

प्रकाशित मिति: सोमबार, माघ १४, २०८१ २०:५७

प्रतिक्रिया दिनुहोस्