पूर्वाधार समितिको बैठकमा मन्त्रीहरू पुगे, सांसदहरू नजाँदा स्थगित

पूर्वाधार

गृहपृष्ठ
पूर्वाधार

पूर्वाधार समितिको बैठकमा मन्त्रीहरू पुगे, सांसदहरू नजाँदा स्थगित

क्यापिटल नेपाल बुधबार, माघ १६, २०८१

काठमाडौं। प्रतिनिधि सभाअन्तर्गतको पूर्वाधार विकास समितिको बैठक कोरम नपुगेपछि स्थगित भएको छ। २५ सदस्यीय समितिमा निर्धारित समयभन्दा डेढ घण्टा समय थप गर्दासमेत बैठक सञ्चालन गर्न आवश्यक न्यूनतम संख्या नपुगेपछि बैठक स्थगित भएको हो।

बिहान ११ः३० बजे बोलाइएको बैठकमा १० सदस्यको मात्र उपस्थिति रह्यो। संघीय संसद्मा प्रतिनिधित्व गर्ने राजनीतिक दलले आफ्ना सदस्यको संसदीय समितिमा हुने उपस्थिति र खेल्ने भूमिकाका आधारमा मूल्यांकन हुने बताइरहेका बेला कोरम नपुगेर बैठक स्थगित हुन पुगेको छ।

सरकारका प्रतिनिधिको अनुपस्थिति भएमा बैठक नचलाइने अभ्यासअनुसार बैठकमा आमन्त्रण गरिएका ऊर्जा, जलस्रोत तथा सिँचाइमन्त्री दीपक खड्का र राज्यमन्त्री पूर्णबहादुर तामाङ भने समितिमा उपस्थित थिए।

उपयुक्त समयमा अर्को बैठक बस्ने समितिका सभापति दीपकबहादुर सिंहले जानकारी दिए। बैठक सञ्चालन गर्न न्यूनतम १३ जना उपस्थित हुनु पर्छ। आजको बैठकमा ऊर्जा मन्त्रालयसँग सम्बन्धित समितिमा परेका उजुरीका सम्बन्धमा छलफल गर्ने कार्यसूची थियो।

प्रकाशित मिति: बुधबार, माघ १६, २०८१ १४:४६

प्रतिक्रिया दिनुहोस्