यातायात कार्यालय बाराद्वारा ७ करोड बढी राजस्व संकलन

पूर्वाधार

गृहपृष्ठ
पूर्वाधार

यातायात कार्यालय बाराद्वारा ७ करोड बढी राजस्व संकलन

क्यापिटल नेपालबिहीबार, वैशाख ११, २०८२

पर्सा। बारास्थित यातायात व्यवस्था कार्यालय कलैयाले चालू आर्थिक वर्षको वैशाख पहिलो सातासम्म ७ करोड ३६ लाखभन्दा बढी राजस्व संकलन गरेको छ।

कार्यालय प्रमुख अविन्दर दासले कार्यालयले संकलन गर्ने राजस्व पछिल्लो समय उत्साहजनक ढंगले वृद्धि भइरहेको र यस अवधिसम्म सात करोड ३६ लाख ५७ हजार ६७५ राजस्व संकलन भएको जानकारी दिए।

‘कार्यालयले साउनदेखि माघको पहिलो सातासम्म चार करोड ३० लाख राजस्व संकलन गरेको थियो। त्यसयता वैशाख पहिलो सातासम्म तीन करोड ६ लाख ५५ हजार राजस्व संकलन भएको छ। पछिल्ला महिनामा राजस्व सङ्कलनको दर क्रमशः वृद्धि हुँदै गइरहेको छ’, उनले भने।

कार्यालयका अनुसार तीन महिनायता प्रतिमहिना औसतमा एक करोड दुई लाख रकम राजस्व संकलन हुँदै आएको छ। कार्यालयले आन्तरिक सुशासन र सेवा प्रवाहलाई चुस्त बनाएसँगै राजस्व संकलन बढेको जनाएको छ।

यो रकममध्ये सबैभन्दा धेरै राजस्व चालक अनुमतिपत्र, सवारीदर्ता किताबसम्बन्धी दस्तुरबाट तीन करोड ५४ लाख ४० हजार ५६ र सवारीसाधन करबाट तीन करोड ४० लाख ३९ हजार ९४३ रकम राजस्व संकलन भएको छ।

यातायात क्षेत्रको आम्दानीबापत ४० लाख ८४ हजार ५४० राजस्व संकलन भएको कार्यालयले जनाएको छ। अन्य प्रशासनिक सेवा शुल्कबापत २५ हजार ५०० र बेरुजुबापत ६७ हजार ३३६ रकम संकलन भएको छ। कार्यालयले चालू आवमा करिब १० करोड राजस्व सङ्कलन हुने अनुमान गरेको छ।–रासस

प्रकाशित मिति: बिहीबार, वैशाख ११, २०८२ ०६:४६

प्रतिक्रिया दिनुहोस्