राजस्व अनुसन्धानद्वारा ध्रुव कन्स्ट्रक्सनविरुद्ध सवा १ अर्ब बढीको मुद्दा दायर

अर्थतन्त्र

गृहपृष्ठ
अर्थतन्त्र

राजस्व अनुसन्धानद्वारा ध्रुव कन्स्ट्रक्सनविरुद्ध सवा १ अर्ब बढीको मुद्दा दायर

क्यापिटल नेपाल मंगलबार, वैशाख २३, २०८२

काठमाडौं। राजस्व अनुसन्धान विभागले राजस्व चुहावट कसुरमा ध्रुव कन्स्ट्रक्सन सञ्चालक ध्रुव देवविरुद्ध १ अर्ब २० करोडको मुद्दा मुद्दा दायर गरेको छ।

उच्च अदालत पाटनमा सोमबार सञ्चालक देवबाट १ अर्ब २० करोड ९२ लाख ३० हजार ५ सय असुलउपर गर्न तथा कैद सजाय मागदावी गर्दै अभियोगपत्र दायर गरिएको विभागको सूचनामा उल्लेख छ।

काठमाडौं महानगर–३१ नयाँ बानेश्वरस्थित ठेक्कापट्टा, कन्सल्टेन्सी सेवा तथा कन्स्ट्रक्सन सामान खरिद बिक्री कारोबार गर्ने ध्रुव कन्स्ट्रक्सन सञ्चालक देवले वस्तु तथा सेवाको हस्तान्तरण नगरी बिलबिजक मात्र जारी गरेको, खरिद कारोबारको भुक्तानी बैंकमार्फत नगरेको, बिजक सिलसिलेबार जारी नगरेको, मूल्य अभिवृद्धि कर विवरण र आय विवरण दाखिला नगरेको, मूल्य अभिवृद्धि कर तथा आयकरतर्फ झुटा विवरण पेस गरेको विभागको सूचनामा भनिएको छ।

यस्तै, मालसामान खरिदको स्रोत पुष्टि नभएको तथा सरकारलाई नियमानुसार तिर्नु बुझाउनुपर्ने मूल्य अभिवृद्धि कर तथा आयकरलगायतका राजस्व नतिरी राजस्व चुहावट (अनुसन्धान तथा नियन्त्रण) ऐन, २०५२ को दफा ३ विपरीत कार्य गरेकाले अदालतमा मुद्दा दायर गरिएको विभागका सूचना अधिकारी तथा अनुसन्धान अधिकृत नवराज अधिकारीले बताए।

494688441_1361446088522030_1518110701642033392_n_sTV1EhaHhB-1746495195.jpg