काठमाडौं। न्यूयोर्कको ब्रुकलिन ब्रिजमा मेक्सिकोको नौसेनाको प्रशिक्षण जहाज ठोक्किँदा दुई जनाको मृत्यु भएको छ। घटनामा अन्य १९ जना घाइते भएको न्युयोर्क शहरका मेयर एरिक एडम्सले जानकारी दिएका छन्।
शनिबार राति न्युयोर्क शहरमा रहेको ब्रुकलिनको पुलको खम्बामा ठोक्किँदा जहाजले आफ्ना तीन वटै मस्तुलहरू तोडेको थियो। पुलमा बसी वसन्त ऋतुको साँझको आनन्द लिइरहेका दर्शक भयभीत बनेका थिए।
एडम्सले एक्समा लेखेका छन्, ‘यो समयमा जहाजमा सवार २७७ मध्ये दुई जनाको निधन भएको, दुई जना गम्भीर घाइते भएका र १९ जना सामान्य घाइते भएका छन्।’
अनलाइनमा सेयर गरिएको भिडियोमा मेक्सिकोको नौसैनिक जहाज ‘कुउहाटेमोक’, यसको पालहरू र उत्सवबत्तीहरू लत्रेको देख्न सकिन्छ। जहाज पुलमुनिबाट अघि बढिरहेका समय मुस्तुलले पुलको एक भागलाई ठक्कर दिँदा दुर्घटनाग्रस्त भएको थियो।
यसअघि, मेक्सिकोको नौसेनाले एक विज्ञप्ति जारी गर्दै प्रशिक्षणका क्रममा पानीजहाज दुर्घटना भएको र यसमा सवार २२ जना घाइते भएको र तीमध्ये तीन जनाको अवस्था गम्भीर रहेको जनाएको थियो।
न्युयोर्कका प्रहरी प्रमुख विल्सन अरामबोलेसले पत्रकार सम्मेलनमा क्याप्टेनले जहाजलाई चलायमान बनाइरहेका बेला जहाजले शक्ति गुमाएको र ब्रुकलिनतर्फको पुलतर्फ मोडिएको बताए।
न्युयोर्कको यातायात विभागले एक्समा लेखेको छ, 'ब्रुकलिन ब्रिजमा संरचनागत क्षतिको कुनै संकेत देखिएको छैन। तर, थप निरीक्षण जारी रहेको छ।’
दुर्घटनाका कारण ब्रुकलिनबाट म्यानहटन जाने पुल पुनः सञ्चालनमा आउनुअघि करिब ४० मिनेटका लागि अवरूद्ध गरिएको थियो।
