काठमाडौं। इटालियन लक्जरी फेसन ब्रान्ड एम्पोरियो अर्मानी अब आधिकारिक रूपमा नेपालमा प्रवेश गर्न लागेको छ। एक रणनीतिक साझेदारीमार्फत एम्पोरियो अर्मानीले काठमाडौंमा आफ्नो पहिलो आधिकारिक शोरूम खोल्ने तयारी गरेको हो। निकट भविष्यमा यो ब्रान्ड नेपालका प्रमुख शहरमा पनि विस्तार गर्ने योजना रहेको छ।
जर्जियो अर्मानीद्वारा स्थापित एम्पोरियो अर्मानी कम्फरटेबल र आधुनिक फेसनको प्रतीक मानिन्छ। यस ब्रान्डले आफ्ना उत्पादनमा उच्च गुणस्तर, उत्कृष्ट डिजाइन र मिहिन कलाकौशल समावेश गर्छ।
एम्पोरियो अर्मानीले विश्वका उत्कृष्ट फेसन डिजाइनर र उत्तम कपडा, एक्ससेसोरिज् तथा अन्य कच्चा पदार्थकोको छनोट गर्दै फेसनको दुनियाँमा नयाँ शैली स्थापना गर्दै आएको छ। यो ब्रान्डले उपभोक्ताको आत्मविश्वास बढाउनुका साथै प्रयोगकर्ताको सुविधा र आरामलाई उत्तिकै महत्त्व दिन्छ।
कपडामा मात्र सीमित नभई, एम्पोरियो अर्मानीले जुत्ता, वालेट, पर्स, बेल्ट, ब्यागलगायतका सम्पूर्ण लाइफस्टाइल उत्पादन उत्पादन तथा बिक्री वितरण गर्ने गर्छ। हालसम्म नेपाली बजारमा नक्कली र अनधिकृत एम्पोरियो अर्मानीका उत्पादन पाइँदै आएका थिए।
तर, अब पहिलोपटक आधिकारिक लक्जरी ब्रान्ड नेपाली उपभोक्ताका लागि उपलब्ध हुँदै छ। एम्पोरियो अर्मानी हालै नेपालमा शोरूम तथा फ्रेन्चाइज स्टोर खोल्न अग्रसर भएको छ। जसले उपभोक्तालाई असलीपन र भरोसाको अनुभव दिलाउने छ।
‘एम्पोरियो अर्मानी केवल फेसन ब्रान्ड होइन, यो आत्मविश्वास, पहिचान र गुणस्तरको प्रतीक हो,' अरमानीका नेपाल प्रतिनिधीले भने, 'हामी यस्तो विश्वस्तरीय ब्रान्ड नेपाल भित्र्याउन पाउँदा गर्व महसुस गरिरहेका छौँ।'
यस साझेदारीसँगै नेपाल अन्तर्राष्ट्रिय लक्जरी फेसनको क्षेत्रमा समावेश हुँदै छ। एम्पोरियो अर्मानीको आगमनले नेपाली बजारमा लक्जरी फेसन र लाइफस्टाइलको नयाँ अध्याय सुरु गर्ने छ।
