काठमाडौं। विश्व वातावरण दिवस २०८२ को अवसरमा नेपालमा पहिलो पटक ‘बिन देयर ह्याक्ड द्याट’ थिममा वेस्ट ह्याकाथनको आयोजना हुने भएको छ।
राष्ट्रिय स्तरको यो कार्यक्रमले प्रविधि विज्ञ, सिर्जनशील व्यक्ति, उद्यमी र जलवायुका अभियान्तालाई समेटेर फोहर व्यवस्थापनको बढ्दो समस्यालाई प्रविधि र सिर्जनशीलताका माध्यमबाट समाधान गर्ने लक्ष्य राखेको छ।
कार्यक्रम जेठ २२ गते बुढानीलकण्ठ नगरपालिकाको सभाहलमा आयोजना हुँदै छ। जहाँ देशका प्रतिभाशाली समाधानकर्ता फोहरलाई अवसरका रूपमा परिवर्तन गर्ने कार्यमा संलग्न हुने छन्।
एनसेल फाउन्डेसन, खाली सिसी र बुढानीलकण्ठ नगरपालिकाको संयुक्त पहलमा आयोजनामा हुने यो ह्याकाथन डिजिटल प्रविधिमा आधारित हुँदै काम गर्दै आएका सेवा प्रदायक, नेपालको औपचारिक फोहर व्यवस्थापन क्षेत्र र प्रगतिशील स्थानीय सरकारबीचको सरकारी निजी साझेदारीको एक सशक्त उदाहरण हो।
ह्याकाथनको उद्देश्य फोहर व्यवस्थापन, रिसाइकल पूर्वाधार, प्लास्टिक प्रदूषण र फोहरमैला व्यवस्थापनमा काम गर्ने अनौपचारिक कामदार विशेष गरी महिलाको सशक्तिकरणका लागि प्रविधिमा आधारित समाधान विकास गर्नु हो।
'डिजिटल इनोभेसन र वातावरण संरक्षणको प्रयासलाई एकै प्लेफर्ममा जोड्ने यस किसिमको नविन पहलमा साथ दिन पाउँदा हामी निकै खुसी छौँ। यस ह्याकाथनले नेपालको सबैभन्दा चुनौतीपूर्ण समस्यामध्ये एक फोहर व्यवस्थापनका लागि सिर्जनात्मक र प्रविधिमा आधारित समाधानको विकास गर्ने विश्वास लिएका छौँ,' एनसेल फाउन्डेसन एन्ड स्पेशल प्रोजेक्ट डाइरेक्टर विशाखा लक्ष्मी खड्काले भनिन्।
नेपालमा दैनिक तीन हजार टनभन्दा बढी फोहर उत्पादन हुँदै आएको छ। तर औपचारिक रिसाइकल प्रणाली अझै विकासोन्मुख अवस्थामा रहेको छ। फोहर व्यवस्थापनको क्षेत्रमा महिलाको सहभागिता ५५ भन्दा कम रहेको छ। यो ह्याकथनले अहिलेको परिस्थितिलाई परिवर्तन गर्दै नविन, समावेशी र कार्यान्वयन योग्य विचारलाई प्रोत्साहन गर्दै समुदाय र जलवायु दिगोपनमा आधारित परिवर्तनशील अर्थतन्त्रको विकास गर्ने लक्ष्य राखेको छ।
ह्याकथनमा सहभागी हुन जेठ १५ सम्म आवेदन खुला रहेको छ। यसमा विद्यार्थी, स्टार्टअप, इन्जिनियर, डिजाइनर, कोडर, फोहर मैला व्यवस्थापनमा अनौपचारिक रुपमा योगदान पुर्याउँदै आएकालगायत सफा तथा स्मार्ट नेपाल बनाउन इच्छुक सबैले भाग लिन सक्छन्।
ल्यान्डफिलदेखि परिपरिवर्तनसम्म, धुवाँ बिनाको फोहर, फोहरमा महिलाको उद्यमशीलता र डिजिटाइज ट्रास गरी चार मुख्य विषयगत क्षेत्रमा प्रतियोगीले समाधान विकास गर्नुपर्ने छ।
यस ह्याकाथनलाई गोल्यान ग्रुप, प्लास्ट नेपाल फाउन्डेसन, कोकाकोला बेभरेजेज नेपाल, सिएनआइवाइइएफ, नबिल बैंक, ग्रो बाई आइडिया, क्लाउडफ्याक्टरी, फ्युजमेसिन, मोडेल इन्स्टिच्युट अफ टेक्नोलोजी, व्यापार पाठशाला, एस इन्स्टिच्यूट अफ म्यानेजमेन्टले सहयोग गरेका छन्। आवेदन दिन वा थप जानकारीका लागि https://wastehackathon.vercel.app/ मा गएर हेर्न सकिन्छ।
