सोलुखुम्बु। पर्यटकीय जिल्ला सोलुखुम्बुको फाप्लु विमानस्थलमा १७ दिनपछि जहाज उडान भएको छ। प्रतिकूल मौसमका कारण गत जेठ २६ देखि अवरुद्ध जहाज उडान १७ दिनपछि बुधबार भएको नेपाल नागरिक उड्डयन प्राधिकरण फाप्लुले जनाएको हो।
प्राधिकरणका वरिष्ठ अधिकृत आयुस थापाका अनुसार बुधबार नेपाल वायुसेवा निगम (नेपाल एयरलाइन्स) को ट्वीनअटर जहाजले काठमाडौँबाट फाप्लुसम्म सफल उडान भरेर पुनः काठमाडौं फर्किएको हो।
जहाज १२ जना यात्रु लिएर फाप्लु आए पनि १० जना यात्रु लिएर काठमाडौं फर्किएको अधिकृत थापाले जानकारी दिए। मौसम छिनछिनमा परिवर्तन भइरहने भएकाले बारम्बार लामो समय उडान ठप्प हुने गर्दछ। जेठ अन्तिमबाट सुरु भएको वर्षा र बाक्लो कुहिरोले लगातार १७ दिनसम्म विमानस्थल ठप्प भएको थियो।
जिल्ला अस्पतालमा उपचार सम्भव नभएका जटिल अवस्थाका बिरामी तथा अशक्त काठमाडौँ पठाउन सकस परेको स्थानीय पदम श्रेष्ठले बताए। उडान बन्द हुँदा गम्भीर अवस्थाका बिरामीको जीवन जोखिममा परेको स्थानीय स्वास्थ्यकर्मीहरु बताउँछन्। काठमाडौं ‘रेफर’ गरिएका बिरामीलाई जहाजमार्फत पठाउन नसकिँदा घन्टौं लगाएर गाडीमार्फत ओखलढुंगा तथा विराटनगर पठाउनुपरेको स्थानीय पेम्बा शेर्पाको भनाइ छ।
सगरमाथा क्षेत्र घुम्न आउने पर्यटकको मुख्य गेटवे लुक्ला हो भने फाप्लु वैकल्पिक स्थलका रुपमा लिने गरिन्छ।मौसमले उडान अवरुद्ध हुँदा फाप्लु हुँदै लुक्ला पुग्ने पर्यटकले योजना परिवर्तन गरिरहेको यातयात व्यवसायी मिङ्मार शेर्पाले बताए।
नियमित उडान तालिका कागजमै सीमित
जिल्लाका सदरमुकाम नजिकको फाप्लु विमानस्थलमा हाल नेपाल एयरलाइन्सबाहेक अन्य निजी विमान कम्पनीहरुले नियमित उडान तालिका राखेका छैनन्। मौसम प्रतिकूल भइरहने र यात्रुसमेत पर्याप्त नुहने भएपछि निजी विमान कम्पनीहरुले नियमित उडान तालिका समावेश नगरेका हुन्।
नेपाल एयरलाइन्सले सातामा सोमबार, बुधबार, शुक्रबार र शनिबार काठमाडौं–फाप्लुमा उडान भर्ने तालिका तय गरेको छ। तर, मौसमका कारण ती उडान अवरुद्ध हुँदा यात्रु मारमा परेका छन्। नेपाल नागरिक उड्डयन प्राधिकरण फाप्लुका अनुसार हरेक महिना औसत १०/१२ दिन मात्र उडान हुन सक्ने अवस्था रहन्छ।
अर्कोतर्फ नेपाल एयरलाइन्ससँग अहिले फाप्लुका लागि चल्ने ट्वीनअटर जहाजको संख्या सीमित छ। पाइलट अभाव र अन्य प्राविधिक कारणले गर्दासमेत तालिका प्रभावित हुने गरेको प्राधिकरणले जनाएको छ।
फाप्लुबाट काठमाडौँसम्मको सडक मार्गको दूरी करिब २७५ किलोमिटर छ तर, त्यो सडक अहिले पनि गाडीका लागि पूर्ण रूपमा उपयुक्त छैन। बीपी राजमार्गको सिन्धुली, खुर्को तथा काभ्रे क्षेत्रको सडक पहिरोका कारण जोखिमपूर्ण भएकाले जिल्लाबासीलाई संघीय राजधानी काठमाडौँ आउजाउ गर्न कठिन छ।
स्थानीय विमला राई भन्छिन्, ‘सडकबाट जान भनेको शरीरलाई यातना दिनु हो। बिरामी छ भने झन् यात्रा कहिल्यै सकिँदैन जस्तो लाग्छ।’ स्थानीय तहका जनप्रतिनिधिले हवाई सेवा नियमित बनाउन सरकारको ध्यानाकर्षण गराउँदै आएका छन्।
प्रमुख जिल्ला अधिकारी अनोजकुमार घिमिरे भन्छन्, ‘मौसमका कारण नियमित उडान असम्भव हुन्छ, तर यसलाई वैकल्पिक रुपमा सेनाको हेलिकप्टर, निजी एयरलाइन्ससँग सहकार्य गरेर काम गरिरहेका छौं। जहाजको भर नहुँदा बिरामी, सुत्केरी तथा अन्य अति आवश्यक सरकार कामका लागि धेरै सास्ती खेप्नुपर्दछ।’–रासस
