परिसंघले उत्पादनमुलक उद्योगलाई सेयर बजारमा लैजान पहल गर्ने

उद्योग

गृहपृष्ठ
उद्योग

परिसंघले उत्पादनमुलक उद्योगलाई सेयर बजारमा लैजान पहल गर्ने

क्यापिटल नेपालसोमबार, चैत ३, २०७६

काठमाडौं । नेपाल उद्योग परिसंघले सेयर बजारमा उत्पादनमुलक उद्योगको हिस्सा बढाउन पहल गर्ने भएको छ । परिसंघ र नेपाल धितोपत्र बोर्डले सेयर बजारमा उत्पादनमूलक क्षेत्रको हिस्सा बढाउने तथा बजार सुधार प्रक्रियालाई गति दिन सहकार्य गर्ने प्रतिवद्धता जनाएका छन् ।

धितोपत्र बोर्डका अध्यक्ष भिष्मराज ढुंगानालाई परिसंघमा स्वागत गर्दै परिसंघका अध्यक्ष सतिशकुमार मोरले नेपालमा उत्पादनमूलक तथा सेवा उद्योगको प्रतिनिधित्व गर्ने संगठन भएकाले सेयर बजारको विकास तथा सुधारका लागि परिसंघ तत्पर रहेको बताए ।

अध्यक्ष मोरले बोर्डमा नयाँ नेतृत्व आएपछि पूँजी बजारमा देखिएको सुधारको गतिलाई निजी क्षेत्रले स्वागत गरेको पनि उल्लेख गरे । सेयर कारोबारको समय बढाइएको तथा लगानीकर्ताको हित अनुकूलका व्यवस्थाहरु अघि बढाएकोमा पनि अध्यक्ष मोरले निजी क्षेत्र उत्साहित भएको बताए ।

अध्यक्ष मोरले धितोपत्र बोर्डको सञ्चालक समितिमा परिसंघको प्रतिनिधित्वको व्यवस्था गरी थप सहकार्यका लागि समेत आग्रह गरेका थिए ।
सो अवसरमा बोर्डका अध्यक्ष ढुंगानाले सेयर बजारको विकास र सुधारका लागि थप पहलहरु लिइरहेको बताए ।

हालै बोर्डले कार्यान्वयनमा ल्याएको विशिष्टिकृत लगानी कोष नियमावलीले स्वदेशी तथा गैर–आवासीय नेपाली लगायत वैदेशिक पूँजी समेत परिचालनलाई सहज बनाएकाले यसमा सहभागिता बढाउन पनि अध्यक्ष ढुंगानाले आग्रह गरे ।

धितोपत्र बजार मार्फत पूँजीको सृजना तथा परिचालनलाई महत्व दिएर उत्पादनमूलक र अन्य क्षेत्रको सहभागिता बढाउँदै सेयर बजारलाई थप सन्तुलित बनाउन आवश्यक रहेकोले परिसंघको सहयोग महत्वपूर्ण रहने पनि अध्यक्ष ढुंगनाले उल्लेख गरेका थिए ।

प्रकाशित मिति: सोमबार, चैत ३, २०७६ १८:३०

प्रतिक्रिया दिनुहोस्