सुकेटार विमानस्थलमा हवाई सेवा ठप्प, प्रतिकूल मौसम बन्यो बाधक

पर्यटन

गृहपृष्ठ
पर्यटन

सुकेटार विमानस्थलमा हवाई सेवा ठप्प, प्रतिकूल मौसम बन्यो बाधक

क्यापिटल नेपालशनिबार, असार १४, २०८२

फाइल तस्बिर

फुङ्लिङ (ताप्लेजुङ)। ताप्लेजुङको एक मात्र हवाई सेवा सञ्चालन हुँदै आएको सुकेटार विमानस्थलमा हवाई उडान ठप्प भएको छ।

चार महिना लामो बन्दपछि चैतको अन्तिम साताबाट पुनः सञ्चालनमा आएको नेपाल वायु सेवा निगमको हवाई सेवा जेठ ३० यता एकपटक पनि सञ्चालन हुन सकेको छैन।

निगमका ताप्लेजुङ स्टेसन इञ्चार्ज नारायणकुमार कार्कीका अनुसार बर्खायाम सुरु भएसँगै कुहिरो र कम भिजिबिलिटीका कारण असारयता चार उडान प्रभावित भएका छन्।

प्रत्येक सोमबार र शुक्रबार नियमित हुने काठमाडौं–ताप्लेजुङ उडान निरन्तर रद्द हुन थालेपछि यात्रु मर्कामा परेका छन्। इञ्चार्ज कार्कीले भने, ‘मौसम प्रतिकूल भएकाले जहाजले अवतरण गर्न सक्ने अवस्था छैन। भिजिबिलिटी न्यून भएकाले सुरक्षाको दृष्टिकोणले उडान रोकिनुपरेको हो।’

शुक्रबार ताप्लेजुङ–काठमाडौँ र काठमाडौँ–ताप्लेजुङ उडानमा तीन–तीनजना यात्रुले टिकट लिएका थिए। तर, मौसम सुध्रिन नसक्दा उडान रद्द भयो। नियमित उडान नहुँदा जिल्ला आवतजावत गर्ने यात्रुको संख्या घट्दै गएको छ।

टिकट लिएर पनि गन्तव्यमा पुग्न सकिने विश्वास नभएपछि यात्रु सवारीसाधनको भरमा लामो दूरीको यात्रा गर्न बाध्य भएका छन्।

वर्षायाममा बारम्बार उडान अवरुद्ध हुने समस्या दोहोरिएपछि यात्रु वैकल्पिक र भरपर्दो यातायातको माग गर्दै आएका छन्। ताप्लेजुङको दुर्गम भूगोलमा हवाई सेवा जीवनरेखाजस्तै रहेकाले यस्ता समस्या समाधानका लागि दीर्घकालीन रणनीति आवश्यक देखिएको छ।-रासस

प्रकाशित मिति: शनिबार, असार १४, २०८२ ०८:२०

प्रतिक्रिया दिनुहोस्