काठमाडौं। वर्षाको समय पनि आगलागीका घटना हुुँदैन होला भन्ने लाग्न सक्छ। तर, अवस्था त्यस्तो नरहेको राष्ट्रिय विपद् जोमिख न्यूनीकरण तथा व्यवस्थापन प्राधिकरणको तथ्यांकले देखाएको छ।
देशभर वर्षा भइरहेका बेला पनि पछिल्ला दिनमा आगलागीका घटनाका कारण ठूलो जनधनको क्षति भएको छ।प्राधिकरणका अनुसार सक्रिय मनसुन रहेको, देशव्यापी रुपमा पानी परिरहे पनि आगलागीको घटना उल्लेख्य भएका छन्।
साउन ३ गते बिहान १० बजेदेखि ४ गते बिहान १० बजेसम्म मात्रै ६ वटा आगलागीका घटना घटेका छन्। त्यसबाट ६ जनाको निधन भएको छ भने एक घाइते भएका छन्। आगलागीबाट ४० परिवार प्रभावित भएका छन् ।
गत वैशाखदेखि साउन ४ सम्म ९६९ वटा आगलागीका घटना घटेका छन्। त्यसबाट १४ जनाको ज्यान गएको छ। आगलागीमा परेर एक सय ४० जना घाइते भएका छन्। त्यसबाट एक हजार ७९ परिवार प्रत्यक्ष रुपमा प्रभावित भएको प्राधिकरणको विवरणमा उल्लेख छ।
गत वैशाखदेखि हालसम्म वन डढेलोको संख्या १५८ छन्। त्यसबाट दुई जना घाइते हुँदा २७ घरपरिवार प्रभावित भएका छन्। हावाहुरीका दुई सय ७३ घटना रेकर्ड हुँदा आठको ज्यान गएको छ।
कुल ३९ जना घाइते हुँदा पाँच सय ३१ परिवार हावाहुरीका कारण प्रभावित भएका छन्। सो अवधिमा ६३ वटा सर्पदंशको घटना घटेका छन्।
सर्पदंशका कारण पाँच जनाको ज्यान गएको छभने ६४ घाइते भएका छन्। ७० परिवार प्रभावित बनेका छन्। देशभर बाढीको एक सय ३७ घटना रेकर्ड भएका छन्। त्यसबाट १३ जनाको ज्यान जानुका साथै एक हजार दुई सय ४६ परिवार प्रभावित भएका छन्। बाढीमा परेर २० जना बेपत्ता भएका छन्।
पहिरोमा एक सय ८३ वटा घटना रेकर्ड भएको छ । पहिरोमा परेर सात जनाको ज्यान जाँदा ९ घाइते भएका छन्। कुल एक सय ९९ परिवार प्रभावित भएका छन्।
सो अवधिमा देशभर दुई सय २४ पटक परेको चट्याङबाट २८ जनाको निधन भएको छ। एक सय ६० जना घाइते हुँदा दुई सय ६० परिवार प्रभावित भएका छन्। लेक लागेर ११ जना, जनावरको आक्रमणमा परेर १२ जनाको ज्यान गएको छ।
