पोखरा फाइनान्स र समृद्धि मर्ज हुने, १ः१ को स्वाप रेसियो सम्झौता

बैंकिङ

गृहपृष्ठ
बैंकिङ

पोखरा फाइनान्स र समृद्धि मर्ज हुने, १ः१ को स्वाप रेसियो सम्झौता

क्यापिटल नेपालसोमबार, साउन ५, २०८२

काठमाडौं। कास्कीको पोखरामा केन्द्रीय कार्यालय रहेको पोखरा फाइनान्स र मकवानपुरको हेटौंडामा केन्द्रीय कार्यालय रहेको समृद्धि फाइनान्स कम्पनी मर्ज हुने भएका छन्।

मर्जरपछि पोखरा फाइनान्स लिमिटेडका नाममा एकीकृत कारोबार हुनेछ भने केन्द्रीय कार्यालय काठमाडौंमा सारिनेछ। दुवै संस्थाबीच १ः१ को स्वाप रेसियोमा (एक सेयर बराबर एक सेयर)मर्जरको सहमति भएको हो।

दुई कम्पनीबीचको मर्जर सम्झौतामा पोखरा फाइनान्सका अध्यक्ष तिलबहादुर गुरुङ र समृद्धि फाइनान्सका अध्यक्ष सुदीप घिमिरेले हस्ताक्षर गरे।

दुवै कम्पनीले नियामकीय स्वीकृति लिएपछि मंसिरभित्र एकीकृत कारोबार सुरु गर्ने सहमति भएको छ। मर्जर प्रक्रियाअन्तर्गत आइतबारदेखि दुवै फाइनान्स कम्पनीको सेयर कारोबार नेप्सेमा रोक्का गरिएको छ।

राष्ट्र बैंकबाट ‘ग’ वर्गको इजाजत प्राप्त दुई संस्थाले मर्ज हुन एकापसमा गाभ्ने/गाभिने (मर्जर)सम्बन्धी समझदारीपत्रमा हस्ताक्षर गरेका हुन्। हाल पोखराको चुक्ता पुँजी १ अर्ब ८ करोड २५ लाख छ भने समृद्धिको ८१ करोड ८९ लाख रुपैयाँ छ।

मर्जरपछि बन्ने सञ्चालक समिति अध्यक्षसहित सात सदस्यीय बन्नेछ। समितिमा समृद्धिका तर्फबाट अध्यक्ष र तीन सञ्चालक रहँदा पोखराका तर्फबाट तीन सञ्चालक हुनेछन्। सञ्चालकको टुंगो लागे पनि प्रमुख कार्यकारी अधिकृतबारे निर्णय भइनसकेको दुवै संस्थाले जनाएका छन्।

दुई वित्तीय संस्था मर्जरपछि बन्ने पोखरा फाइनान्सको चुक्ता पुँजी १ अर्ब ९० करोड १४ लाख ६८ हजार पुग्नेछ।मर्जरपछि एकीकृत संस्था अझ सबल, सक्षम र उत्कृष्ट बन्ने दाबी गरिएको छ।

प्रकाशित मिति: सोमबार, साउन ५, २०८२ ०७:५०

प्रतिक्रिया दिनुहोस्