काठमाडौं। नक्कली सुन देखाएर २१ लाख ५० हजार ठगी गरेको अभियोगमा दुई जनालाई प्रहरीले पक्राउ गरेको छ।
पक्राउ पर्नेमा सिन्धुपाल्चोक बाह्रबिसे नगरपालिका ५ घर भई हाल भक्तपुर ठिमि ८ बोडे बस्ने २८ वर्षीय बुद्धिबहादुर तामाङ तथा नुवाकोट मेगङ गाउँपालिका ८ घर भई हाल भक्तपुर चागुनारायण ८ सुडाल बस्ने २२ वर्षीय सुमन तामाङ रहेका काठमाडौं उपत्यका अपराध अनुसन्धान कार्यालयका सूचना अधिकारी एवं प्रहरी उपरीक्षक काजीकुमार आचार्यले जानकारी दिए।
उनका अनुसार नक्कली सुन देखाइ प्रतितोला एक लाख १० हजारमा दिन्छु भनी प्रलोभनमा पारी गत फागुन २५ गते ओखलढुंगाका ढकबहादुर बुढाथोकीबाट १२ लाख र जेठ २७ गते दोलखा भीमेश्वर ५ का अर्जुन बस्नेतबाट नौ लाख ५० हजार लिई फरार रहेको अभियोगमा उनीहरूलाई पक्राउ गरिएको हो।
उनीहरूको साथबाट सुनजस्तो देखिने पहेलो धातु (एक केजी) एक थान बरामद गरिएको थियो। दुवै जनालाई थप अनुसन्धान तथा आवश्यक कारबाहीको लागि जिल्ला प्रहरी परिसर भक्तपुर पठाइएको सूचना अधिकारी आचार्यले बताए।
यसैगरी काठमाडौं महानगरको कर्मचारी हुँ भन्दै १३ लाख २५ हजार असुली गरेको अभियोगमा प्रहरीले एक जनालाई पक्राउ गरी आज सार्वजनिक गरेको छ।
पक्राउ पर्नेमा दोलखा सैलुङ गाउँपालिका २ घर भई हाल काठमाडौं महानगर ६ बस्ने २८ वर्षीय राजु लामा रहेका प्रहरीले जनाएको छ।
लामाले काठमाडौं महानगर ३१ स्थित वडा एरियामा आफू काठमाडौं महानगरको सरसफाई कर्मचारी हुँ भन्दै प्रत्यक घरबाट रकम उठाउने गरेकाले प्रहरी वृत्त नयाँ बानेश्वरबाट खटिएको प्रहरी टोलीले नियन्त्रणमा लिएको हो।
अनुसन्धानका क्रममा निज महानगरको कर्मचारी नभएको, तर पटकपटक गरी हालसम्म १३ लाख २५ हजार असुली गरेको र निजको साथबाट नगद ६ हजार ५००, रसिद, बिलबिजक पाँच थान, कोटेश्वर बेष्ट कन्सर्नको महसुल कार्ड नौ थान, नेपाल फूलबारी सेवा प्रालिको सरसफाइ शुल्क कार्ड दुई थान बरामद गरी थप अनुसन्धान भइरहेको प्रवक्ता बोहराले जानकारी दिए।
