वैदेशिक रोजगार प्रलोभन देखाएर सवा ४ करोड ठगी गर्ने सिंह पक्राउ

समाज

गृहपृष्ठ
समाज

वैदेशिक रोजगार प्रलोभन देखाएर सवा ४ करोड ठगी गर्ने सिंह पक्राउ

क्यापिटल नेपाल बिहीबार, साउन २९, २०८२

काठमाडौं। प्रहरीले वैदेशिक रोजगारको प्रलोभन देखाएर करिब ६६ जनाबाट ४ करोड १७ लाख ठगी गर्ने एनएन मेरिटाइम ट्रेनिङ एनड एजेन्सी प्रालिका सञ्चालक त्रिलोक सिंहलाई पक्राउ गरेको छ।

काठमाडौँ उपत्यका अपराध अनुसन्धान कार्यालयको टोलीले सिंहलाई कास्कीबाट पक्राउ गरेको हो।

पक्राउ परेका २९ वर्षीय सिंहको स्थायी ठेगाना बझाङको बुंगल नगरपालिका वडा–६ भए पनि हाल उनी काठमाडौंको बूढानीलकण्ठ नगरपालिका वडा–१ मा बस्दै आएका थिए।

डम्बर देउवालगायत पीडितले दिएको जाहेरीका आधारमा सिंहविरुद्ध वैदेशिक रोजगार ठगी सम्बन्धी मुद्दा दायर भएको थियो। मुद्दा चलेपछि फरार रहेका सिंह पोखरा महानगरा–२७ स्थित डाँडाकोनामा लुकेर बसेको विशेष सूचनाका आधारमा प्रहरीले पक्राउ गरेको हो।

उपत्यका अपराध अनुसन्धान कार्यालयबाट खटिएको टोलीले इलाका प्रहरी कार्यालय, शिशुवा, कास्कीसँगको समन्वयमा साउन २८ मा सिंहलाई पक्राउ गरेको प्रहरी बुलेटिनमा उल्लेख छ।

उनलाई थप अनुसन्धान र कारबाहीका लागि वैदेशिक रोजगार विभाग, ताहाचल, काठमाडौंमा बुझाएको प्रहरीले जनाएको छ।

प्रकाशित मिति: बिहीबार, साउन २९, २०८२ ०९:०७

प्रतिक्रिया दिनुहोस्