कञ्चनपुर। कञ्चनपुर र डडेल्धुराको भित्रि मधेस जोड्ने दैजी जोगबुढा सडक आठ वर्षमा पाँच किलोमिटर मात्रै कालोपत्रे भएको छ।
वेदकोट नगरपालिकास्थित दैजीदेखी डडेल्धुराको सिमाना लिप्नासम्म १२ किमि सडक निमार्णका लागि २०७४ वैशाख ८ मा नार्गाजुन कन्स्ट्रक्सनसँग २१ करोड २६ लाख ५३ हजारमा ठेक्का सम्झौता भएको थियो। ठेक्का सम्झौताअनुसार २०७६ साउन ५ गते निमार्ण सम्पन्न गरिसक्नुपर्ने भए पनि हालसम्म सडक निमार्णले पूर्णता पाएको छैन।
हालसम्म सडक निमार्णका लागि पाँच पटक म्याद थप भएको छ। सडक निमार्णका लागि पछिल्लो पाचौँ पटक २०८२ असार २० गते निर्माण सम्पन्न गर्ने गरी म्याद थप गरिए पनि उक्त समयसमेतमा सडक निमार्ण हुन नसकेको पूर्वाधार विकास कार्यालय महेन्द्रनगरले जनाएको छ।
गत आर्थिक वर्षमा सडम निमार्णको काम नहुँदा एक करोड बजेट फ्रिज भएको थियो। कार्यालयका सूचना अधिकारी लक्ष्मणराज जोशीले सडक निमार्णका लागि हालसम्म पाँच पटक म्याद थप गरिएको भए पनि सडक निर्माण सम्पन्न हुन नसकेको गरिएको जानकारी दिए।
‘अहिलेसम्म पाँच किलोमिटर सडक मात्रै कालोपत्रे भएको छ’, उनले भने, ‘सात किमि सडक निमार्णको काम बाँकी नै छ। निर्माण व्यवसायिले हालसम्म १८ करोड ३६ लाख रकम भुक्तानी पाइसकेको छ।’ उनका अनुसार निमार्ण व्यवसायिले दुई करोड ९० लाख भुक्तानी पाउन मात्रै बाँकी छ।
कञ्चनपुरबाट डडेल्धुरालगायत सुदूरपश्चिमका पहाडी जिल्ला जान दूरीका हिसाबले नजिक पर्ने उक्त सडक निर्माण नहुँदा यहाँका स्थानीयले सास्ती खेप्नुपरेको छ।
‘पञ्चायतकालमा सुरु भएको सडक अहिलेसम्म पनि निर्माण हुन सकेको छैन’, स्थानीय केशव बोहराले भने, ‘यो सडक निर्माण नहुँदा हामीले धेरै दुःख पाएका छाैं। हिउँदमा धुलाम्य हुन्छ वर्षामा ज्यान जोखिममा राखेर यात्रा गर्नुपर्ने बाध्यता छ।’
उनले उक्त ३१ किमि सडक निर्माण नहुँदा स्थानीयले १५० किमि घुमाउरो बाटो प्रयोग गर्नुपरेको गुनासो गरे। डडेल्धुराको भित्री मधेसलाई कञ्चनपुरसँग जोड्न यो छोटो दूरीको सडक भीमदत्त राजमार्गको विकल्पको रूपमा समेत छ।–रासस
