काठमाडौं। अपि पावर कम्पनीको लगानीमा सूर्यकुण्ड हाइड्रो इलेक्ट्रिकले नुवाकोटको दुप्चेश्वर गाउँपालिकामा निर्माण सम्पन्न गरेको ११ मेगावाट क्षमताको माथिल्लो तादी खोला जलविद्युत आयोजनाले औपचारिक रुपमा व्यावसायिक उत्पादन सुरु गरेको छ।
कम्पनीका अनुसार आयोजनाले २०८२ असार १८ गते निर्माण सम्पन्न गरी १५ दिनको सफल परीक्षण सञ्चालन सकेको थियो।
परीक्षण चरण सफलतापूर्वक सम्पन्न भएपछि आयोजनाले २०८२ साउन १२ देखि नियमित रुपमा राष्ट्रिय प्रसारण प्रणालीमा बिजुली आपूर्ति गर्दै आयोजनाको व्यापारिक उत्पादन थालेको हो।
सूर्यकुण्ड हाइड्रो इलेक्ट्रिक लिमिटेड उर्जाको विकास र सञ्चालन गर्ने उद्देश्यले स्थापना भएको कम्पनी हो। कम्पनीमा अपि पावर कम्पनी लिमिटेडको बहुमत सेयर लगानी रहेको छ। आयोजनाले ३ चैत २०६८ मा नेपाल विद्युत् प्राधिकरणसँग विद्युत् खरिद सम्झौता गरेको थियो।
ऊर्जा मन्त्रालयबाट आवश्यक वातावरणीय प्रारम्भिक अध्ययन २०८१ असोज ८ मा स्वीकृत भएको थियो। कम्पनीले विद्युत विकास विभागबाट २०७२ असोज २२ मा उत्पादन इजाजतपत्र प्राप्त गरेको थियो।
परियोजनाको इन्टेक करिब १५०० मिटर र पावरहाउस १२८२ मिटरको उचाइमा रहेको छ। पावरहाउसमा जडान गरिएका दुईवटा पेल्टन टर्बाइन युनिट (प्रत्येक ५.५ मेगावाट) बाट कुल ११ मेगावाट उत्पादन हुनेगरी आयोजना डिजाइन गरिएको छ।
डाइभर्सन बाँध र सहायक संरचना १०० वर्षको पुनरावृत्तिमा हुने बाढीलाई समेत ध्यानमा राखी डिजाइन गरिएको हो, जसको परिमाण २४७ घनमिटर प्रतिसेकेन्ड अनुमान गरिएको छ।
नुवाकोटको समुन्द्रटार सबस्टेसनमा स्वीचयार्डमार्फत जोडिएको आयोजनाबाट उत्पादित बिजुली ६ किलोमिटर लामो ३३ केभी ट्रान्समिसन लाइनमार्फत राष्ट्रिय ग्रिडमा आपूर्ति हुन थालेको छ।
यस प्लान्टबाट वार्षिक ६१ दशमलव ३१९ गिगावाटघन्टा विद्युत् उत्पादन हुने अनुमान गरिएको छ। यसमध्ये ५० दशमलव ८९३ गिगावाटघन्टा वर्षायाममा र १० दशमलव ४२५ गिगावाटघन्टा सुक्खा मौसमी अवधिमा उत्पादन हुने अनुमान गरिएको छ।
कम्पनीको प्राथमिक सेयर निष्कासन आईपीओ प्रक्रिया अगाडि बढिसकेको छ भने धितोपत्र बोर्डको पाइपलाइनमा रहेको छ।
