इन्द्रजात्राका सारथीलाई पाँच लाखसम्मको बिमा

बैंकिङ

गृहपृष्ठ
बैंकिङ

इन्द्रजात्राका सारथीलाई पाँच लाखसम्मको बिमा

क्यापिटल नेपाल बुधबार, भदौ १८, २०८२

काठमाडाैं। यसवर्षको इन्द्रजात्रामा रथ थान्नेलगायतका भूमिकामा रहने व्यक्तिलाई पाँच लाख रुपैयाँसम्मको बिमा गरिने भएको छ।

गुठी संस्थानद्वारा यसवर्षको इन्द्रजात्राको तयारीसम्बन्धी जानकारी दिन आज आयोजित पत्रकार सम्मेलनमा पर्वमा अहोरात्र खटिनेका लागि पहिलो पटक यस्तो व्यवस्था गरिएको जानकारी दिइयो।

राष्ट्रप्रमुख सहभागी हुने र देशका प्रमुखपर्वमध्ये पर्ने इन्द्रजात्रामा हनुमानढोका आसपासका मानन्धरलगायत विभिन्न समुदायका झण्डै ८०० जना संलग्न रहने गर्छन्। “तीमध्ये पर्व सुरु भएदेखि सम्पन्न नभएसम्म अहोरात्र खटिने करिब १०० जनालाई एकदेखि पाँच लाख रुपैयाँसम्मको दुर्घटना बिमा गर्न लागेका हौँ”, संस्थानका कार्यकारी प्रमुख शैलेशराज कुँवरले भने।

यसवर्षको इन्द्रजात्रा भदौ ९ गते लिंगाे काटेर सुरु भई २६ गते बेलुका १०ः३० बजे समापन हुँदैछ। यसका लागि आवश्यक सम्पूर्ण खर्च व्यवस्थापन, जनशक्ति परिचालन र विभिन्न निकायबीच समन्वय गुठी संस्थानले गरिरहेको छ। जात्रा सम्पन्न गर्न हनुमानढोका दरबार कार्यालय, काठमाडौं महानगर, नेपाली सेनादेखि नेपाल विद्युत् प्राधिकरणसम्मका निकाय संलग्न छन्।

पत्रकार सम्मेलनमा दिइएको जानकारीअनुसार यही भदौ ९ गते सूर्यविनायक नगरपालिकाको चित्तपोल वनबाट लिङ्गालाको रुख काटेर सुरु भएको यसवर्षको जात्रामा १५ गते उक्त लिंगाेलाई हनुमानढोका पुर्‍याउने काम भएको छ। अब १९ गते ध्वजापताकासहितको उक्त लिङ्गो उठाएपछि राजधानीमा इन्द्रजात्रा सुरु हुन्छन्।

प्रकाशित मिति: बुधबार, भदौ १८, २०८२ १८:०४

प्रतिक्रिया दिनुहोस्