‘डाइभर्सन’ नहुँदा दसपांग्रे मालवाहक ट्रली भन्सारमै थन्किए

पूर्वाधार

गृहपृष्ठ
पूर्वाधार

‘डाइभर्सन’ नहुँदा दसपांग्रे मालवाहक ट्रली भन्सारमै थन्किए

क्यापिटल नेपाल शुक्रबार, असोज १७, २०८२

मुस्ताङ। लोघेकर दामोदरकुण्ड–२ घमी खोलामा सडक डाइभर्सन नहुँदा मुस्ताङ भन्सार कार्यालयमा जाँचपास भइसकेका सिनो हाइड्रो पावर कम्पनीका १८ वटा मालबाहक ट्रली भन्सार कार्यालय न्हेचुङमै थन्किएका छन्।

जोमसोम–कोरला सडकअन्तर्गत घमी खोलामा सडक डाइभर्सन नहुँदा चीनबाट आयात गरिएका उपकरण तथा निर्माण सामग्रीसहितका १० पांग्रे ट्रली मंगलबारदेखि भन्सार कार्यालय न्हेचुङमै थन्किएका हुन्।

कोरलानाकाबाट ढुवानी गरी फर्किएका मझौला खालका मालबाहक कन्टेनर मुश्किलले तल झारिए पनि ‘हेभी’ मालवाहक ट्रलीको भार अस्थायी पुलले थेग्न नसक्ने भएकाले भन्सार कार्यालयमा रोकिएको प्रमुख जिल्ला अधिकारी विष्णुप्रसाद भुसालले जानकारी दिए। अब दसैंपछि व्यवसायी र आयोजना मिलेर डाइभर्सन निर्माण गरी समस्या समाधान गरिने उनले बताए।

लोघेकर दामोदरकुण्ड गाउँपालिका अध्यक्ष लोप्साङ छोम्फेल विष्टका अनुसार कोरलानाका पूर्ण रूपमा सञ्चालनमा आए पनि कोरला सडकको घमी खोलामा सडक डाइभर्सन नहुँदा समस्या भएको उनको भनाइ छ। व्यापारीसँग समन्वय गरी डाइभर्सन निर्माण गर्न पहल भइरहेको उनले बताए।

घमी खोलामा निर्माणाधीन पुल सात वर्ष भइसक्दासमेत सम्पन्न हुन सकेको छैन। पुल निर्माणका लागि २०७५ ६ करोड ८० लाख लागतमा हिमढुङ ठोक्कर एन्ड इमोटल जेभी कन्टक्सनसँग ठेक्का सम्झौता भएको थियो।

निर्माण कम्पनीलाई आयोजनाले दैनिक हर्जानासमेत लगाइरहेको भए पनि काम अझै अघि बढ्न सकेको छैन। एक स्पानको ४० मिटर लामो पुल बनाउने भनिएकामा हालसम्म ७५ प्रतिशत भौतिक प्रगति भएको आयोजनाले जनाएको छ।–रासस

प्रकाशित मिति: शुक्रबार, असोज १७, २०८२ १०:२५

प्रतिक्रिया दिनुहोस्