विद्युतीय खरिद प्रणालीमा बोलपत्रको म्याद थपियो

पूर्वाधार

गृहपृष्ठ
पूर्वाधार

विद्युतीय खरिद प्रणालीमा बोलपत्रको म्याद थपियो

क्यापिटल नेपाल सोमबार, असोज २०, २०८२

काठमाडौं। सार्वजनिक खरिद अनुगमन कार्यालयले असोज १९ र २० गते सार्वजनिक बिदाका कारण विद्युतीय खरिद प्रणालीमा बोलपत्र पेश गर्ने अन्तिम म्याद थपेको छ। कार्यालयले सार्वजनिक खरिद ऐन २०६३ को दफा ११ को उपदफा १ को खण्ड 'ग' बमोजिम असोज १९ र २० गते अनलाइन राखिला गर्ने अन्तिम म्याद समाप्त हुन बाँकी रहेका सम्पूर्ण बोलपत्र, आशयपत्र, प्रस्ताव तथा दरभाउपत्रको म्याद क्रमशः असोज २१ र २२ गतेसम्म कायम गरेको छ।

यस्तै, विद्युतीय खरिद प्रणाली मार्फत प्रकाशित बोलपत्र, प्रस्ताव तथा दरभाउपत्रहरूको सम्झौता गर्न बोलपत्रदाताहरूले कार्यसम्पादन जमानत पेश गर्नुपर्ने समयसीमा असोज १९ र २० मा परेको भए सो समयसीमा पनि असोज २४ गतेसम्म थपिएको कार्यालयले जनाएको छ।

गृह मन्त्रालयको असोज १८ गते प्रकाशित सूचना अनुसार असोज १९ र २० गते विपद् व्यवस्थापन र अत्यावश्यक सेवासँग सम्बन्धित कार्यालय बाहेक नेपाल राज्यभर सार्वजनिक बिदा दिइएको थियो। सोही आधारमा विद्युतीय खरिद प्रणाली सञ्चालन निर्देशिका २०८० को दफा ११ को उपदफा १ को खण्ड 'ग' बमोजिम बोलपत्रको म्याद स्वतः थप भएको हो।