लाङटाङमा फसेका १२ जनाको सकुशल उद्धार, थप चार जनाको खोजी हुँदै

पर्यटन

गृहपृष्ठ
पर्यटन

लाङटाङमा फसेका १२ जनाको सकुशल उद्धार, थप चार जनाको खोजी हुँदै

क्यापिटल नेपाल सोमबार, असोज २०, २०८२

तस्बिर, नेपाली सेना

काठमाडौं। ट्रेकिङका क्रममा निरन्तरको वर्षापछि रसुवाको गोसाइँकुण्ड गाउँपालिका–५ ड्यामसाइड क्षेत्रमा फसेका १६ मध्ये १२ जनालाई नेपाली सेनाको उद्धार टोलीले सकुशल उद्धार गरेको छ।

असोज १७ देखि १९ सम्म लगातार वर्षा भएपछि ड्यामसाइड इलाकामा पुगेका १६ जना र मजदुर समूह फसेको थियो। तीमध्ये १२ जनालाई नेपाली सेनाको श्रीनाथ गणबाट खटिएको टोलीले उद्धार गरेर स्याफ्रुबेंसी ल्याएको सेनाले जनाएको छ।

उद्धार गरिएका सबैलाई प्रारम्भिक स्वास्थ्य परीक्षणपछि सुरक्षित स्थानमा राखिएको सेनाले बताएको छ।

शनिबार गोसाइँकुण्ड गाउँपालिका–४ स्थित बेरिङ खोलाले बगाउँदा चार जना बेपत्ता भएका छन्। बेपत्ता हुनेमा मध्यपुर थिमि नगरपालिकाकी संस्कृति श्रेष्ठ, किशन श्रेष्ठ, संगीता श्रेष्ठ र भक्तपुर नगरपालिका–१० बस्ने रवि श्रेष्ठ रहेको रसुवा प्रहरीले जनाएको छ।

हराइरहेका चार जनाको खोजी कार्य निरन्तर भइरहेको छ। नेपाली सेना, नेपाल प्रहरी र सशस्त्र प्रहरी बल नेपालका खोज तथा उद्धार टोलीले ड्यामसाइड, भांगे झरनालगायत पाँच स्थानमा खोजी कार्य गरिरहेका छन्।

निरन्तर वर्षा र कठिन भौगोलिक अवस्थाका कारण उद्धारमा चुनौती भइरहेको सुरक्षाकर्मीले बताएका छन्।

प्रकाशित मिति: सोमबार, असोज २०, २०८२ १३:५३

प्रतिक्रिया दिनुहोस्