१० वर्षसम्म बनेन १३ किलोमिटर सडक, ठेकेदार सम्पर्कविहीन

पूर्वाधार

गृहपृष्ठ
पूर्वाधार

१० वर्षसम्म बनेन १३ किलोमिटर सडक, ठेकेदार सम्पर्कविहीन

क्यापिटल नेपाल बुधबार, असोज २२, २०८२

बागलुङ। निसीखोला गाउँपालिका–६ पातिहाल्नेदेखि पूर्वी रुकुमको भूमे गाउँपालिका–१ रुपगासम्मको १३ किलोमिटर सडक एक दशकमा पनि पूरा नहुँदा यो बाटोको यात्रा कष्टकर बनेको छ।

निर्माण व्यवसायीको लापर्वाहीका कारण निर्धारित समयमा काम पूरा नभएको हो। २०७३ जेठ १३ भित्र कालोपत्रे सक्ने सम्झौता भएकामा हालसम्म ७० प्रतिशत मात्र काम भएको दैलेखस्थित मध्यपहाडी लोकमार्ग कार्यालयका सूचना अधिकारी नवीन खरालले बताए।

लोकमार्गअन्तर्गतको उक्त खण्ड कालोपत्रे गर्न ४२ करोड ९९ लाख चार हजारमा सम्झौता भएको हो। पटक–पटक म्याद थपेर सम्झौताअनुसारको काम पूरा गर्न निर्माण कम्पनीलाई निर्देशन दिइएको उनको भनाइ छ।

‘मध्यपहाडी लोकमार्गमा धेरै सवारीसाधन चल्न थालेका छन्, दैनिक सयौँ यात्रु यही मार्गबाट यात्रा गर्छन्। पातिहाल्नेदेखि रुपगासम्म कालोपत्रे गर्न सबै तयारी भएको थियो, तर लामो समयदेखि निर्माण कम्पनी नआउँदा बनेका संरचना पनि भत्किएका छन्’, सूचना अधिकारी खरालले भने।–रासस

प्रकाशित मिति: बुधबार, असोज २२, २०८२ ०८:०८

प्रतिक्रिया दिनुहोस्