भूपाल बराललाई राजस्व सचिवको जिम्मेवारी

अर्थतन्त्र

गृहपृष्ठ
अर्थतन्त्र

भूपाल बराललाई राजस्व सचिवको जिम्मेवारी

क्यापिटल नेपाल बुधबार, कात्तिक २६, २०८२

काठमाडौं। सरकारले बागमती प्रदेशका प्रमुख सचिव भूपाल बराललाई अर्थ मन्त्रालयको राजस्व सचिवको जिम्मेवारी दिएको छ।

सरकारले पाँच जना सचिवहरूको सरुवा गर्दा लामो समय अर्थ मन्त्रालयसँग सम्बन्धित भई काम गरेका बराललाई राजस्व सचिवको जिम्मेवारी दिएको हो।

गत सोमबार बसेको मन्त्रिपरिषद् बैठकले बराललाई अर्थ मन्त्रालयमा राजस्व सचिवको जिम्मेवारी दिने निर्णय गरेको हो। अर्थमा केही समययता राजस्व सचिव पद रिक्त हुँदै आएको थियो।

यसअघि उनी आन्तरिक राजश्व विभाग र राजश्व अनुसन्धान विभागको महानिर्देशक बनेका थिए। यस्तै, उनले अर्थ मन्त्रालयको बजेट महाशाखा, आर्थिक नीति विश्लेषण महाशाखा र वित्तीय क्षेत्र व्यवस्थापन तथा संस्थान समन्वय महाशाखाको प्रमुख बनेर काम गरेको अनुभव रहेको छ।

त्यस्तै, लुम्बिनी प्रदेशका प्रमुख सचिवलाई बागमती प्रदेशको जिम्मेवारी दिइएको छ। सचिव कृष्णप्रसाद काप्रीलाई लुम्बिनी प्रदेशमा पठाइएको छ।

अर्का सचिव कमल पोखरेललाई प्रधानमन्त्री कार्यालयको अतिरिक्त समूहमा सरुवा गरी ल्याइएको छ भने बैकुन्ठ अर्याललाई सुदूरपश्चिम प्रदेशको प्रमुख सचिवको जिम्मेवारी दिइएको छ।

प्रकाशित मिति: बुधबार, कात्तिक २६, २०८२ १५:३३