ट्राफिक जनचेतना फैलाउन ठमेलमा सांस्कृतिक कार्यक्रम हुने

समाज

गृहपृष्ठ
समाज

ट्राफिक जनचेतना फैलाउन ठमेलमा सांस्कृतिक कार्यक्रम हुने

क्यापिटल नेपाल शुक्रबार, माघ २, २०८२

काठमाडौं। ट्राफिक प्रहरीले ट्राफिक जनचेतना फैलाउनका लागि राजधानीको प्रमुख पर्यटकीय गन्तव्य ठमेलमा साङ्गीतिक कार्यक्रम गर्ने भएको छ।

काठमाडौं उपत्यका ट्राफिक प्रहरी कार्यालयले ठमेल पर्यटन विकास परिषद्को सहकार्यमा सवारी दुर्घटना न्यूनीकरणका लागि माघ ३ गते काठमाडौं महानगर २६ सञ्चयकोष अगाडि सडकमा साङ्गीतिक कार्यक्रम गर्न लागेको हो।

कार्यालयका प्रवक्ता, प्रहरी उपरीक्षक (एसपी) नरेशराज सुवेदीले युवालाई ट्राफिक जनचेतना फैलाउनका लागि साङ्गीतिक कार्यक्रम आयोजना गरिएको जानकारी दिए। उक्त कार्यक्रममा नेपालका चर्चित गायक जोन चाम्लिङ राईको सहभागीता रहने प्रवक्ता सुवेदीले बताए।

ट्राफिक कार्यालयले ‘सभ्य नागरिकको चिनारी, सडक दुर्घटना न्यूनीकरण हामी सबैको जिम्मेवारी’ भन्ने मूल नाराका साथ गत पुस २६ गतेदेखि सुरु भएको ट्राफिक सप्ताह भोलि समापन हुँदैछ। ट्राफिक सप्ताहको समापन प्रहरी महानिरीक्षक दानबहादुर कार्कीको प्रमुख उपस्थितीमा गरिने कार्यक्रम रहेको प्रवक्ता सुवेदीले बताए। उक्त कार्यक्रममा सांस्कृतिक कार्यक्रमका साथै एक हप्ताभित्र गरेका कामलाई वृत्तचित्रमार्फत प्रस्तुत गर्ने कार्यक्रम रहेको छ।

ठमेल पर्यटन विकास परिषद्का निवर्तमान अध्यक्ष भविश्वर शर्माले युवामा ट्राफिक जनचेतना फैलाउनका लागि यस्ता जनचेतनामुलक कार्यक्रमले सहयोग पुग्ने बताए। उनले उक्त कार्यक्रममा सहभागी जनाउन ठमेल क्षेत्रका घरधनी तथा व्यवसायीलाई आग्रह समेत गरे।

प्रकाशित मिति: शुक्रबार, माघ २, २०८२ १७:०८