निर्माणाधीन सभाखोला ‘बी’ आयोजनाको सुरुङ ब्रेक थ्रु, अनुमानित लागत ५ अर्ब रुपैयाँ

पूर्वाधार

गृहपृष्ठ
पूर्वाधार

निर्माणाधीन सभाखोला ‘बी’ आयोजनाको सुरुङ ब्रेक थ्रु, अनुमानित लागत ५ अर्ब रुपैयाँ

क्यापिटल नेपाल बुधबार, माघ २१, २०८२

काठमाडौं। संखुवासभाको सभापोखरी गाउँपालिकामा निर्माणाधीन सभाखोला ‘बी’ जलविद्युत् आयोजनाको मुख्य सुरुङ छिचोलिएको छ। सभाखोलाको पानी उपयोग गरी निर्माण भइरहेको २१.५ मेगावाट क्षमताको आयोजनाको ४ हजार ११० मिटर लामो सुरुङ ‘ब्रेक थ्रु’ गरिएको हो।

निजी क्षेत्रको पहलमा अघि बढाइएको आयोजनाको इनटेक क्षेत्र सभापोखरी गाउँपालिका–३ मा रहेको छ भने आयोजना सभापोखरी–३, ४ र ५ मा फैलिएको छ। आयोजना इन्चार्ज कृष्णप्रसाद पन्तका अनुसार जलाशयको मुहानबाट सुरु भई पेनस्टक पाइप जडान हुने स्थानसम्मको सुरुङ सफलतापूर्वक छिचोलिएको हो।

सुरुङमा कंक्रिट लाइनिङको बाँकी काम गरिनेछ। मुख्य सुरुङबाट आएको पानीलाई १ हजार ४५ मिटर लामो पेनस्टक पाइपमार्फत विद्युत्गृहमा खसालेर विद्युत् उत्पादन गरिनेछ। हालसम्म आयोजनाको करिब ७५ प्रतिशत निर्माण कार्य सम्पन्न भइसकेको छ।

आयोजनाबाट उत्पादन हुने विद्युत् खाँदबारी नगरपालिका–१० स्थित शितलपाटीमा निर्माणाधीन विद्युत् प्राधिकरणको सवस्टेशनमा जोडिनेछ। २०७९ कात्तिक २३ देखि सुरु आयोजना निर्माण आगामी वैशाख २३ सम्म सम्पन्न गर्ने लक्ष्य छ।

आयोजनाअन्तर्गत प्रसारण लाइन निर्माणको करिब ६० प्रतिशत काम सकिएको छ। करिब ५ अर्ब रुपैयाँ लागत अनुमानको आयोजनाको मुख्य निर्माण जिम्मेवारी वैभव पावर नेपालले सम्हालेको छ। अर्बिट इनर्जीका प्रबन्ध सञ्चालक गणेश कार्कीले सुरुङ ब्रेक थ्रु भएको घोषणा गरेका थिए।

प्रकाशित मिति: बुधबार, माघ २१, २०८२ १०:५२