काठमाडौं। भदौ २३ र २४ को जेनजी आन्दोलन र त्यसको भोलिपल्टको विध्वंससम्बन्धी छानबिन गर्न गठित 'भदौ २३ र २४ को घटनासम्बन्धी जाँचबुझ आयोग, २०८२' ले आइतबार प्रधानमन्त्री सुशीला कार्कीलाई आफ्नो प्रतिवेदन बुझाउने भएको छ। आयोगका एक सदस्यका अनुसार आयोगले दुई दिनका घटनालाई छुट्टाछुट्टै अध्ययन गरी भिन्नभिन्न सिफारिस तयार पारेको छ।
भदौ २३ मा भएको जेनजी आन्दोलनमा तत्कालीन सरकारपक्षबाट किन र कसरी बल प्रयोग भयो भन्ने विषयलाई आयोगले केन्द्रमा राखेको छ। ती आन्दोलनकारीमाथि भएको दमनमा संलग्न व्यक्तिहरूका विरुद्ध कारबाहीको सिफारिस गरिएको आयोगका सदस्यले जानकारी दिए।
भदौ २४: विध्वंसको छुट्टै छानबिन
भदौ २४ मा संसद् भवन, सिंहदरबार, सर्वोच्च अदालत, राष्ट्रपति कार्यालय र प्रधानमन्त्री निवाससहित थुप्रै सरकारी तथा निजी संरचनामा आगजनी र लुटपाट भएको थियो। यस विध्वंसमा को कसरी संलग्न थियो भन्ने विषयमा छुट्टै अध्ययन भई कारबाहीका लागि सिफारिस गरिएको छ।
आयोगका सदस्यले भने — "भदौ २३ गतेको आन्दोलनमा प्रहरी तथा सरकारबाट दमन किन भयो भन्ने कोणबाट अध्ययन भएको छ। २४ गते भएको विध्वंसको छुट्टै अध्ययन भएको छ — त्यो दिन कसले कसरी विध्वंस गर्यो भन्ने अध्ययन भएको छ।"
मन्त्रिपरिषद्ले पूर्वन्यायाधीश गौरीबहादुर कार्कीको अध्यक्षतामा यो तीन सदस्यीय आयोग गठन गरेको थियो। नेपाल प्रहरीका पूर्वएआईजी विज्ञानराज शर्मा र कानुनविद् विश्वेश्वरप्रसाद भण्डारी सदस्यका रूपमा रहेको यस आयोगले अब प्रतिवेदन बुझाएपछि सरकारले थप कारबाहीको बाटो खोल्नेछ।
जेनजी आन्दोलनका क्रममा राज्यको बल प्रयोगका कारण मारिएका र घाइते भएकाहरूको न्यायका लागि यो प्रतिवेदन निर्णायक कदम मानिएको छ।
-(1)-1761629966.jpeg)
