काठमाडौं। केही दिनयता काठमाडौं उपत्यकालगायत मुख्य सहरमा वायु प्रदूषण घट्न थालेको छ। बिहीबार मध्याह्नसम्म प्रदूषण वायु गुणस्तर सूचकांक १७८ हाराहारी रहेकामा आज मध्याह्नसम्म वायु गुणस्तर सूचकांक १४९ कायम भएको एयर क्वालिटी इन्डेक्स (एक्युआई)को तथ्यांकले देखाएको छ।
बिहीबार मध्याह्नसम्म काठमाडौं विश्वकै दोस्रो प्रदूषित सहरका रूपमा सूचीकृत भएकामा आज सोही समय १२औं स्थानमा झरेको छ। केही दिनयता मौसम धुम्मिँदै जाँदा वायु प्रदूषण बढेको थियो।
वातावरण विभागका महानिर्देशक ज्ञानराज सुवेदीले बिहीबार भएको वर्षाका कारण आज वायु प्रदूषण पनि कम भएको जानकारी दिए।
‘वर्षाले हावामा रहेको धुलो तथा कणलाई जमिनमा झार्न मद्दत गर्ने र हावाले धुलो तथा प्रदूषणका कण उठाएर लैजाँदा प्रदूषण कम हुन्छ’, उनले भने, ‘दिगो तथा वातावरणमैत्री विकासका उपाय प्रभावकारी रूपमा कार्यान्वयन गर्न सम्बन्धित निकायलाई सुझाव दिएका छौं।’
वातावरणविद् भूषण तुलाधरले समयमै पूर्वतयारी, पातपतिंगर व्यवस्थापन, डढेलो नियन्त्रण तथा सवारीसाधनको धुवाँ परीक्षण र मापदण्डको कडाइका साथ कार्यान्वयन आवश्यक रहेको सुझाए।
जल तथा मौसम विज्ञान विभागका मौसमविद् सञ्जीव अधिकारीले बिहीबारदेखि नै मौसममा सुधार आएको र वर्षा भएसँगै वायुमा रहेको प्रदूषण हटाउन मद्दत गरेको जानकारी दिए। उनका अनुसार विगत २४ घन्टामा सबैभन्दा धेरै वर्षा बामतीको चितवननारायणी फिल्ड कार्यालयमा रहेको मौसम मापन केन्द्रमा १२६.२ मिलिमिटर मापन भएको छ।
त्यस्तै गण्डकी प्रदेशको लमजुङ घरेढुंगा केन्द्रमा १०२.२ मिलिमिटर र गोरखाको बारपाक केन्द्रमा ९० मिलिमिटर वर्षा मापन गरिएको छ। कोसी प्रदेशको उदयपुर कटारीमा ९८.४ मिलिमिटर तथा झापाको चन्द्रगढी विमानस्थल केन्द्रमा ९६.४ मिलिमिटर वर्षा मापन गरिएको थियो।
एक्युआईको मापदण्डअनुसार ० देखि ५० सम्म ‘राम्रो’ मानिन्छ भने ५१ देखि १०० सम्म ‘सचेत रहनुपर्ने’ श्रेणीमा पर्छ। एक सय एकदेखि १५० ‘अस्वस्थ’ मानिन्छ, जसले विशेषगरी श्वासप्रश्वास तथा मुटु रोगीलाई असर गर्न सक्छ। एक सय ५१ देखि २०० ‘सबैका लागि अस्वस्थ’, २०१ देखि ३०० ‘धेरै अस्वस्थ’ र ३०० भन्दा माथि ‘अत्यन्त खतरनाक’ मानिन्छ।
-1773388953.jpeg)
